Studimi italian/ Lidhja midis trendit të epidemisë Covid-19 dhe ujërave të zeza

Mjeteve që përdorin epidemiologët për të parashikuar trendin e Covid, së shpejti mund t’i shtohet edhe analiza e ujërave të ndotura. Një hulumtim nga Instituti Mario Negri dhe Universiteti Shtetëror i Milanos në të vërtetë ka vërtetuar se përqendrimet e materialit gjenetik viral në ujërat e ndotura, para se të pastrohen, janë një tregues i besueshëm për parashikimin e trendit të një kurbe epidemiologjike, në këtë rast të Covid.

Testet u kryen në mostrat e ujërave të zeza të marra në tetë qytete Lombardë gjatë valës së parë, midis fundit të marsit dhe mesit të qershorit të vitit 2020. Materiali gjenetik viral u gjet në 61% të mostrave, me sasinë e 80% në ujërat e zeza nga qytete veçanërisht të prekura – të tilla si ato në provincën e Bergamos – dhe në një masë më të vogël në Lodi, Milano, Crema dhe Kremona. “Në disa vende ne kemi qenë në gjendje të vëzhgojmë një rritje në numrin e mostrave pozitive me një përparim prej 7-14 ditësh në lidhje me rritjen e kurbës së infeksionit”, thotë Sara Castiglioni, studiuese në Institutin Mario Negri dhe autorja e parë e studimit.

Aktualisht llogaritja e kurbave epidemike bazohet në të dhënat klinike dhe rezultatet e tamponave. Sidoqoftë, këta tregues nuk arrijnë gjithmonë të kapin asimptomatikën, ndërsa analiza e ujërave të ndotura mund të ndihmojë për të vlerësuar në kohë reale – dhe para diagnozave – madhësinë e atij grupi njerëzish në një zonë të caktuar, dhe ndoshta edhe për t’i lokalizuar ato . Për më tepër, studimet e mëparshme kanë treguar praninë e virusit në fecen e rreth gjysmës së njerëzve të infektuar.

 “Prania e materialit gjenetik të SARS-CoV-2 në ujërat e zeza nuk do të thotë se këto përfaqësojnë një burim të infektimit”, specifikon Castigioni: “virusi mbijeton për një kohë të shkurtër jashtë trupit të njeriut. Ne thjesht gjejmë fragmente të ARN-së, asnjëherë agjentin infektues të paprekur. Testet e kryera nga grupe të tjera mbi ujërat e zeza, pikërisht në Milano, konfirmojnë këto të dhëna “.

Hulumtimi i Mario Negri dhe i Universitetit Shtetëror të Milanos tani vazhdon me analiza të mëtejshme, të kryera kësaj here në mostrat e marra, përsëri në Lombardi, gjatë verës së kaluar (2020) dhe në fillim të valës së dytë. “Ne jemi ende duke përpunuar të dhënat, por deri më sot rezultatet konfirmojnë që epidemiologjia e ujërave të ndotura mund të përfaqësojë me të vërtetë një mjet të dobishëm për vlerësimin e trendit të infeksionit”, përfundon Castiglioni: “ne në fakt po vëzhgojmë një negativitet të përgjithshëm të mostrave të marra në verë, dhe një rritje progresive të pranisë së materialit gjenetik viral duke filluar nga shtator-tetor. ” (Focus)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.