Studimi/ Ja cila është rruga më e shpejtë për t’u bërë një CEO
Sipas një studimi 10-vjecar të quajtur Projekti Genome i CEO, në të cilin janë mbledhur një grup të dhënash prej më shumë se 17 mijë vlerësimesh ekzekutive shefash dhe studiuar 2600 në thellësi është arritur në përfundimin se kush arrin në krye dhe rrugën që i duhet për ta realizuar këtë sa më shpejt.
Gjetja ishte e mrekullueshme dhe befasuese pasi: ata që arrijnë në pozicione drejtuese në rrugë të shkurtër dhe të shpejtë nuk e realizojnë këtë duke arritur përsosmërinë intelektuale apo mbaruar kurse dhe specializime, përkundrazi. Ata e bëjnë këtë duke bërë lëvizje të guximshme në karrierë gjatë rrjedhës së periudhës së tyre profesionale çka i katapulton ata shumë shpejt në majë të kompanive. Në studim u zbuluan 3 lloj katapultimesh që ndodhnin më së shumti. 97% e tyre ndërmorën të paktën një nga këto strategji dhe afro 50% kishin provuar të paktën dy prej tyre. Pjesa tjetër që përfaqëson 24% sigurisht e kishin arritur këtë rezultat duke mbaruar MBA elitare e të tjera specializime.
Përveç këtyre 3 mënyrave, ajo çka e bën një drejtor apo shef kompanie të suksesshëm janë dhe veçori të tjera në personalitet dhe sjellje si vendosmëria, besueshmëria, adaptueshmëria dhe aftësia për t’u angazhuar për të ndikuar të tjerët.
Ja cilat janë tre llojet e strategjive për t’u bërë një CEO i suksesshëm për një kohë të shkurtër:
Kërko të voglën për të arritur të madhen
Rruga drejt pozicionit të CEOs rrallë shkon në një vijë të drejtë; ndonjëherë ju duhet të lëvizni prapa ose anash në mënyrë që të përparoni. Më shumë se 60% e sprinters (atyre që ndjekin një nga këto strategji për tu bërë CEO) morën një rol më të vogël në një pikë të karrierës së tyre. Duke filluar diçka të re brenda kompanisë së tyre (duke hedhur në treg një produkt të ri për shembull), ose duke u zhvendosur në një kompani më të vogël për të marrë përsipër një përgjegjësi më të madhe, ose duke filluar biznesin e tyre. Në secilin rast, ata shfrytëzuan mundësinë për të ndërtuar diçka nga baza që tashmë kishin, për të pasur një impakt më të madh më pas.
Bëni një kërcimin e madh
Më shumë se një e treta e sprinters u katapultuan në krye duke bërë “kërcimin e madh”, shpesh në dekadën e parë të karrierës së tyre. Këta drejtues treguan kujdes para vështirësive por i thanë po mundësive, edhe kur roli ishte përtej çdo gjëje që ata kishin bërë më parë dhe ata nuk ndjeheshin plotësisht të përgatitur për sfidat e ardhshme.
Trashëgoni një rrëmujë të madhe
Mund të duket paradoksale dhe pak e çuditshme, por një mënyrë për të provuar aftësinë tuaj për të qenë CEO është të trashëgoni një rrëmujë të madhe. Mund të jetë një njësi e biznesit që nuk po punon si duhet, një produkt i dështuar ose një falimentim, çdo problem i madh për biznesin që duhet të rregullohet shpejt. Më shumë se 30% e sprinters të analizuar kishin aftësinë të udhëhiqnin ekipet e tyre përmes një rrëmujë të madhe.
Përshpejtimi i karrierës tuaj përmes këtyre katapultave nuk kërkon një MBA elitare ose një përzierje të zgjedhur të tipareve të lindura, por kërkon një gatishmëri për të bërë lëvizje anësore, jo konvencionale dhe madje edhe të rrezikshme në karrierë. (HBR)
E.S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.