Studimi për emigrantët – 52% punonjës të kualifikuar, mbizotërojnë meshkujt

Një pjesë e mirë e emigrantëve shqiptarë janë integruar prej vitesh në vendet e Bashkimit Europian ku edhe punojnë. Një studim i fundit që fokusohet tek diaspora shqiptare në Gjermani jep edhe disa të dhëna interesante.

Të paktën vetëm për vitin 2015 rezultojnë 16 611 të punësuar me shtetësi shqiptare në Gjermani. Nga ky total 11 183 janë meshkuj ndërsa 5428 femra. Por cilës kategorie i përkasin këta të punësuar tregut të punës në Gjermani.

Të paktën 52 % janë punonjës të kualifikuar, 41 % janë punonjës të pakualifikuar, 4 % janë të nivelit ekspert dhe 3% të nivelit specialist. Të dhënat e studimit u prezantuan gjatë një aktiviteti të organizuar nga GIZ në Shqipëri ku morën pjesë edhe përfaqësues nga Ambasada Gjermane dhe Ministria e Jashtme.

Për zëvendësambasadoren Anke Holstein tashmë po ofrohen gjithmonë e më shumë mundësi për shqiptarët në Gjermani por azili nuk është një prej tyre.

Përfaqësuesi i Ministrisë së Jashtme në Tryezë Armand Skapi u shpreh se ka një punë të vazhdueshme për të rritur bashkëpunimin  me diasporën shqiptare dhe fokusi këto kohë është tek zgjidhja e problematikave që u ngritën gjatë Samitit të Diasporës në Tiranë.

Studimi për migracionin u krye nga “Programi Migracioni për Zhvillim” i financuar nga Ministria Federale për Bashkëpunim Ekonomik dhe Zhvillim.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.