Studimi/ Shanset për t’u infektuar me Covid-19 në një avion janë më të ulëta sesa mendoni!

Të qëndruarit ulur mes një numri të madh njerëzish të huaj brenda një avioni mund të duket shumë e rrezikshme dhe plot risk gjatë këtyre kohërave të pasigurta pandemie që po kalon e tërë bota.

Por sipas disa ekspertëve të cilët tregojnë për shumë pak raste të dokumentuara të transmetimit gjatë fluturimit, shanset për të kapur Covid-19 ndërsa ndodheni në bordin e një fluturimi janë relativisht të vogla.

Frika nga fluturimi gjatë pandemisë ka ulur në mënyrë drastike trafikun ajror global, i cili gjithashtu është kufizuar për shkak të mbylljeve të kufijve. Nëse pohohen pretendime të reja shkencore, rreziku i perceptuar i rritur i hipjes në aeroplan mund të jetë i pabazuar.

Në një rast, rreth 328 pasagjerë dhe anëtarët e ekuipazhit u testuan për koronavirus pasi u mësua se një fluturim i 31 Marsit nga SHBA për në Tajvan kishte transportuar 12 pasagjerë që ishin simptomatikë në atë kohë. Sidoqoftë, të gjithë pasagjerët e tjerë rezultuan negativ, ashtu si dhe anëtarët e ekuipazhit.

Dhe ndërsa ka patur sigurisht raste të pasagjerëve të infektuar që i kalojnë virusin ekuipazhit të një aeroplani ose bashkudhëtarëve në muajt e fundit, nivelet e transmetimit janë të ulëta.

Një studim i botuar së fundmi në revistën mjekësore JAMA Network Open gjeti prova të përhapjes së mundshme të koronavirusit gjatë një fluturimi katër-orësh nga Tel Aviv për në Frankfurt në Mars.

Dy pasagjerë zhvilluan infeksione pasi fluturuan me një grup turistësh të cilët kishin rënë në kontakt me një menaxher të infektuar të hotelit dhe gjithashtu u infektuan, sipas studiuesve të Institutit për Virologji Mjekësore në Universitetin Goethe në Frankfurt.

Të dy ata që mund të jenë infektuar ishin ulur në pjesën e prapme të aeroplanit, pikërisht nga ana tjetër e krahut të avionit ku qëndronin shtatë pasagjerë të cilët pa vetëdije kishin kapur virusin.

Një fluturim i hershëm nga Britania e Madhe për në Vietnam më 2 mars, në të cilin një pasagjer në dukje përhapi virusin në rreth 14 pasagjerë të tjerë, si dhe një anëtari të ekuipazhit, deri më tani besohet të jetë i vetmi transmetim i njohur në bord për një numër të lartë njerëzish.

Një shpjegim për nivelin e dukshëm të rrezikut të ulët është se ajri në kabinat moderne të avionëve zëvendësohet me ajër të ri të freskët çdo dy ose tre minuta, dhe shumica e avionëve janë të pajisur me filtra ajri të krijuar për të bllokuar 99,99% të grimcave.

Ndërkohë, janë zbatuar protokolle të ndryshme të reja, siç janë maskat për fytyrën si për pasagjerët ashtu edhe për ekuipazhin, e cila është e detyrueshme në shumicën e linjave ajrore, matja e temperaturave, si dhe pastrimi më intensiv i kabinës dhe lëvizja e kufizuar në kabinë gjatë fluturimit.

Arnold Barnett, një profesor i statistikës në Shkollën e Menaxhimit të Sloanit të Institutit të Teknologjisë së Masaçusetsit, u përpoq të përcaktojë shanset e infektimit me virusin ndërsa ishte në bordin e një fluturimi të shkurtër në një studim të fundit që shikonte përfitimet e politikës së sediljes së mesme të zbrazët.

Sipas gjetjeve të tij, bazuar në fluturimet e shkurtra në SHBA në aeroplanët e konfiguruar me tre vende në të dyja anët e rreshtit, si Airbus 320 dhe Boeing 737 – dhe duke supozuar se të gjithë kanë një maskë – rreziku i kapjes virusi në një fluturim të plotë është vetëm 1 në 4,300. Këto shanse bien në 1 në 7,700 nëse vendi i mesëm është i lirë.

“Tre gjëra duhet të shkojnë keq për ju që të infektoheni (gjatë një fluturimi). Duhet të jetë një pacient Covid-19 në bord dhe ata duhet të jenë ngjitës”, thotë ai. “Nëse ka një person të tillë në fluturimin tuaj, duke supozuar se ata kanë një maskë, kjo nuk do të pengojë në parandalimin e transmetimin. “Ata gjithashtu duhet të jenë mjaft afër që të ekzistojë një rrezik që mund të pësoni transmetim.”

Barnett thotë se i mori parasysh të gjitha këto probabilitete përpara se të përcaktonte një rrezik të përgjithshëm të transmisionit. Këto shifra janë posaçërisht për fluturimet dy-orëshe brenda Shteteve të Bashkuara, vendi aktualisht me numrin më të lartë të rasteve Covid-19 në botë.

Shanset do të jenë më të ulëta për fluturimet e marra në pjesë të globit me pak raste dhe më të larta për fluturimet me distancë të largët pasi “raporti i afërsisë është një faktor së bashku me ekzistencën e afërsisë”, thotë ai. Sidoqoftë, shanset për t’u infektuar janë gjithnjë më të larta për ata që gjenden në sediljet pranë korridorit të avionit, sepse ata thjesht kanë më shumë njerëz rreth tyre. (CNN)

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.