Stuhi dhe erëra të forta në Britani – 30 mijë njerëz ende pa energji ndërsa janë regjistruar 3 viktima
Rreth 30,000 njerëz në veri të Anglisë dhe Skocisë janë ende pa energji elektrike pas stuhisë Arwen. Erërat e forta kanë sjellë borë, akull dhe ndërprerje të rënda në infrastrukturën e Mbretërisë së Bashkuar këtë javë, ndërsa tre persona kanë humbur jetën.
Arwen, një nga stuhitë më të fuqishme në dekada, fillimisht ndërpreu energjinë për qindra mijëra njerëz me erëra me shpejtësi deri në 160 km/h. Sekretari i Biznesit në Mbretërinë e Bashkuar, Kwasi Kwarteng i tha Parlamentit se pothuajse 1 milion njerëzve, ose rreth 95% e të prekurve, u është rikthyer energjia.
Por rreth 30,000 ishin ende pa energji të mërkurën, pesë ditë pas goditjes së parë të stuhisë. Kwarteng tha se vendi duhej të përgatitej për mot më ekstrem për shkak të ndryshimeve klimatike.
Chris Burchell, drejtor menaxhues i Rrjeteve Elektrike Skoceze dhe Jugore, u kërkoi falje klientëve dhe tha se dëmi i shkaktuar nga Arwen ishte “ngjarja më e rëndësishme me të cilën jemi dashur të përballemi ndonjëherë në zonë në një brez”.
Shoqata e Rrjeteve të Energjisë tha se disa familje nuk do ta marrin energjinë elektrike para fundit të javës. Janë ngritur streha dhe ushqime të ngrohta për banorët e prekur, me kompanitë e energjisë që punojnë në partneritet me shërbimet e urgjencës, autoritetet lokale dhe Kryqin e Kuq Britanik.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.