Subjektet në zonat turistike – Manastirliu në Durrës: Gjobë deri në mbyllje të aktivitetit kur nuk plotësojnë kushtet higjieno-sanitare

Çdo subjekt që nuk plotëson kushtet higjieno-sanitare dhe kërcënon shëndetin e qytetarëve do të përballet me gjoba dhe deri në mbyllje të aktivitetit. Paralajmërimi ka ardhur nga ministrja e Shëndetësisë dhe Mbrojtjes Sociale, Ogerta Manastirliu gjatë inspektimit të qendrave shëndetësore në qytetin e Durrësit.

Ministrja paralajmëroi një aksion intensiv në bare, restorante, pishina, subjekte të prodhimit apo përpunimit të produkteve ushqimore për plotësimin e kushteve higjieno-sanitare.

“Ndër masat e shëndetësisë për një sezon turistik të sigurt është kontrolli i vazhdueshëm higjieno-sanitar i subjekteve në zonat turistike, proces që e kemi filluar që prej muajit Prill por po intensifikohet gjatë sezonit dhe jemi të vendosur për të marrë të gjitha masat për të ndëshkuar çdo subjekt që kërcënon shëndetin e qytetarëve, me gjoba deri në mbyllje të aktivitetit”, u shpreh Manastirliu.

Më tej, ajo u ndal te qendrat shëndetësore të cilat ofrojnë shërbim 24/7 gjatë sezonit turistik, duke shtuar se vetëm gjatë muajit qershor 5379 qytetarë morën shërbime në qendrat verore në zonat bregdetare dhe malore.

Manastirliu ndoqi gjithashtu edhe procesin e dezinsektimit në Durrës, sipas të cilës ky proces do të vijojë deri në muajin Shtator.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.