Suedia, në dorë të populistëve – Lofven humbet votën në parlament, bllokohet formimi i Qeverisë
Kryeministri i Suedisë, Stefan Lofven, humbi në votën e mosbesimit në Parlament dhe do të lë detyrën ditën e sotme, por ndërkohë që asnjë bllok tjetër politik nuk mban mazhorancën, mbetet ende e paqartë se kush do të formojë qeverinë e radhës.
Zgjedhjet në datën 9 Shtator rezultuan në një parlament të varur, ku askush nuk fiton mazhorancën dhe blloku i qendrës së majtë të Lofven morri 144 vende, 1 sipër aleancës së qendrës së djathtë.
Analistët presin që lideri i partisë më të madhe të kësaj aleance, Ulf Kristersson, të formojë administratën e re. Megjithatë, duke i munguar mazhoranca, ai mund të kërkojë mbështetje nga demokratët anti-emigracion, ose qendra e majtë.
“Nëse partitë e aleancës zgjedhin që të qeverisin si blloku më i vogël, atëherë atyre i duhet që të varen totalisht nga demokratët e Suedisë”, tha Lofven.
Lideri i demokratëve, Jimmie Akesson, tha se partia e tij kërkon fuqi në vendimmarrje si çmimin e mbështetjes së qeverisë së re.
“Ne do të bëjmë gjithçka për të ndaluar përpjekjet e formimit të qeverisë, nëse nuk na jep influencë të arsyeshme në proporcion me mbështetjen tonë elektorale”, tha ai.
Aleanca e qendrës së djathtë ka thënë se nuk do të negociojë me demokratët e Suedisë, që kërkojnë të ndalojnë emigrimin dhe një referendum për anëtarësinë në Bashkimin Europian.
Lofven i qendrës së majtë ka refuzuar të mbështesë Aleancën në formimin e një qeverie, duke sjell një ngërç politik.
“Unë dua të vazhdoj të drejtoj vendin si Kryeministër dhe një Qeveri që ka një mbështetje të gjerë në parlament”, tha Lofven.
Nëse ngërçi vazhdon, Suedia do të zhvillojë zgjedhje të tjera brenda 3 muajve. Ndërkohë që votimi tjetër nuk ka gjasa të ndryshojë shumë situatën, disa kompromise mund të zhvillohen. Lofven do të drejtojë qeverinë deri sa administrata e re të krijohet.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.