Suksesi i Snap – Aksionet patën rritje në ditën e debutimit në bursë

Snap.Inc, kompania mëmë e Snapchat doli zyrtarisht në bursë, me një debutim mëse të suksesshëm.

Themeluesit Evan Speigel dhe Booby Murphy i ranë ziles që sinjalizon hapjen e bursës së New York-ut dhe shumë shpejt aksionet e kompanisë filluan të shiteshin me 24 dollarë për aksion, rreth 40 për qind më tepër nga sa kishte parashikuar kompania.

Tani çmimi i kompanisë kap vlerën e 28 miliardë dollarëve, ndërsa sipas ekspertëve, debutimi i suksesshëm i Snap mund të nxisë edhe kompani të tjera teknologjike të debutojnë.

Shërbimi kryesor, Snapchat-i ka një bazë aktive prej 158 milionë përdoruesish ditor, ndërsa fitimet e kompanisë janë në rritje të vazhdueshme (404.5 milionë dollarë në vitin 2016).

Gjithesi një rrezik konstant për të ardhmen e kompanisë është fakti se shumë konkurrentë përpiqen të imitojnë shërbimet e saj. Facebook prezantoi opsionin ‘Stories’ në Instagram, çka rezultoi në një ulje të përdoruesve ditorë të Snapchat tremujorin e fundit të 2016-ës.

Tashmë sipas analistëve të tregut, Snap duhet të shikojë Facebook si një model pozitiv dhe të mësojë nga gabimet e Twitter për t’ia dalë mbanë si një rrjet social me përgjegjësitë e një kompanie publike.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.