Sulmi kibernetik në Twitter. Hakerat aksesuan 130 llogari të personaliteteve dhe organizatave
Twitter deklaroi se hakerat kanë shënjestruar rreth 130 llogari gjatë sulmit kibernetik të kësaj jave, në një incident ku u ndikuan profilet e shumë personaliteteve dhe organizatave. Hakerat aksesuan sistemet e brendshme të Twitter për të “rrëmbyer” disa nga zërat më të mëdhenj të platformës, përfshirë kandidatin për president, Joe Biden, Kim Kardashian, ish presidentin Barack Obama dhe miliarderin Elon Musk. Ata i përdorën llogaritë për të kërkuar kriptovaluta.
Në deklaratën e fundit, Twitter bëri të ditur se hakerat i’a dolën të fitojnë kontroll në një nëngrup të vogël të llogarive të shënjestruara dhe kanë bërë postime nëpërmjet tyre. Kompania shtoi se po vazhdon të vlerësojë nëse sulmuesit kanë aksesuar të dhëna private të këtyre llogarive. Llogaritë me profil të lartë që u sulmuan, përfshinë gjithashtu këngëtarin Kanye West, themeluesin e Amazon, Jeff Bezos, investitorin Warren Buffet, themeluesin e Microsoft, Bill gates si dhe llogari korporatash nga Uber dhe Apple.
Njësia e San Fransiscos e FBI po drejton hetimin dhe shumë politikanë në Uashington po bëjnë thirrje për llogaridhënie në lidhje me çështjen. Agjencia e përforcimit të ligjit bëri të ditur se sulmet kibernetike zhvilluan mashtrime kibernetike gjatë incidentit. Regjistrat blockchain të disponueshme për publikun, treguan se hakerat morën kriptovaluta me vlerë mbi 100,000 dollarë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.