“Super” PPP-të e shëndetësisë – KLSH: Check-Up e Dializa paguhen për shërbime të pakryera, sterilizimi rrit kostot
Rreth 3.6 milion lekë janë fondet e shpenzuara përgjatë vitit 2018 për kontratat koncesionare që monitorohen nga Fondi i Sigurimit të Detyrueshëm të Kujdesit Shëndetësor.
Ndërkohë që një auditim i kryer nga Kontrolli Lartë të Shtetit, ka nxjerrë në pah mbrojtjen që iu sigurojnë kushtet e kontratave kompanive koncesionare, që përfitojnë para’ publike për shërbime të pakryera. Kështu, nga auditimi mbi monitorimin e kontratës së kontrollit bazë CHECK-UP, rezultoi se, edhe në 2018-ën, nuk janë arritur projeksionet e kontratës duke bërë që, pagesat e marra tepër nga koncesionari, për punën e pa kryer për vitet 2015, 2016, 2017 dhe 2018, të shkojë në 801 milion lekë.
Kjo është një problematikë e ngritur edhe më herët, por pavarësisht zgjerimit të fashës të personave që mund të kryejnë check-up falas apo kushteve të vendosur për të përfituar disa shërbime publike pasi të vërtetosh se ke kryer check-up, sërish, targeti i pacientëve nuk është arritur, duke bërë që shteti të paguajë privatin për shërbim të pakryer.
E njëjta situatë rezulton edhe nga auditimi mbi monitorimin e paketës së hemodializës, e cila zë peshën më të madhe të 10 paketave spitalore në vlerën 2,095 milion lekë, ku sipas kontratës koncensionare, Fondi duhet të paguajë koncensionarin për numrin e projektuar të pacientëve dhe seancave, pavarësisht se numri efektiv i pacientëve dhe i seancave është më i ulët se ai i projektuar. Sipas KLSH 89% vlerës së paketës realizohet në subjekte privatë dhe me PPP.
Për vitin 2018, paketa e shërbimit të dializës me PPP u realizua në shumën 586 milion lekë nga 410 milion lekë që u realizuar një vit më parë.
Ndërkaq, nga auditimi i përmbushjes së përgjegjësive lidhur me monitorimin dhe likuidimin e shërbimit të integruar të furnizimit të setit të personalizuar të instrumenteve kirurgjikale sterile dhe furnizim me materiale mjekësore sterile, rezultoi se këtë vit, krahasuar me një vit më parë, vlera e këtij shërbimi është rritur për 954 milion lekë, ose 84% më shumë se një vit më parë, rritje e pa parashikuar dhe jashtë parashikimeve të institucionit, duke krijuar detyrim të prapambetur në vlerën 306 milion lekë.
Ndërkohë që, sipas KLSH nuk konstatohet që kjo rritje të ketë vënë në lëvizje strukturat përgjegjëse për të analizuar faktorët dhe për të marrë masa për të mbajtur këtë lloj shpenzimi nën kontroll, por pa krijuar probleme në shërbimin ndaj qytetarit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.