Supermarketi në Mbretërinë e Bashkuar do ndërtojë 3000 shtëpi për klientët e ardhshëm
Zinxhiri i supermarketeve Lidl po planifikon të ndërtojë mijëra shtëpi, shkolla, hotele dhe njësi për akomodimin e studentëve në përpjekje për të fituar lejet e planifikimit për më shumë dyqane. Shitësi gjerman është duke ndërtuar një godinë me dy kate për shkollën “Deer Park”, një shkollë fillore në Richmond, në jugperëndim të Londrës, mbi një supermarket të ri.
Së fundmi është raportuar që zhvillimet e mëtejshme mund të përfshijnë në të ardhmen e kompanisë ndërtimin e 3000 shtëpive së bashku me degët e reja. Disa nga shtëpitë do të ndërtohen nga vetë Lidl ndërsa të tjerat do të ndërtohen përmes partneriteteve me kompanitë e banimit, siç mund të jenë kompanitë e tjera të ngjashme si Sainsbury, Tesco dhe Morrisons.
Javën e kaluar Lidl fitoi një leje për një dyqan në vendin e ish-spitalit falë edhe një propozimi për të ngritur 36 shtëpi të përballueshme ekonomikisht. Këshilltarët bashkiakë kishin hezituar të miratojnë planin për një supermarket jashtë qytetit, por propozimi i strehimit duhet t’i bindë ata që të shkojnë përpara.
Lidl ka plane të mëtejshme për të ndërtuar shtëpi me çmime të ulëta për të ngritur imazhin e supermarketit.
Christian Hartnagel, drejtor menaxhues i Lidl në Mbretërinë e Bashkuar, u shpreh për the Guardian: “Ne jemi krenarë që dyqanet tona po ndihmojnë gjithnjë e më shumë për të hapur rrugën për zhvillim, i cili përkrah nisma të rëndësishme. Kjo do të thotë shumë për ne pasi jemi në gjendje të mbështesim shumë nga komunitetet ku ne jemi pjesë e duke ofruar vlerë shtesë mbi dhe përtej ushqimeve të përballueshme”.
Lidl planifikon të ndërtojë disa prej shtëpive, ndërsa të tjerët janë pjesë e skemave më të gjera të udhëhequra nga zhvilluesit. Kuptohet që firma dëshiron të përqendrohet në shtëpitë e përballueshme dhe jo në zhvillimet luksoze, në përputhje me imazhin e kursimit të parave.
Ada Xhagolli/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.