Superpagat e Avokaturës së Shtetit – Manja: Shqipëria humbet gjyqet, sjellim profesionistë me rrogat e larta
Komisioni Parlamentar i Ligjeve ka miratuar nen për nen Ligjin e ri për Avokaturën e Shtetit, e cila tashmë do të jetë në varësi të Kryeministrisë dhe jo më nën Ministrinë e Drejtësisë. Ligji i ri rregullon mënyrën si do; përfaqësohet shteti shqiptar në gjyqet brenda dhe jashtë vendit, si dhe i jep Avokatit të Shtetit tagrin të ndjekë zbatimin e vendimeve të gjykatave të Strasburgut. Por përsëri pika më e debatuar e Ligjit të ri ishin pagat e zyrtarëve të lartë të kësaj strukture, të cilat do të jenë më të mëdha se të Presidentit, Kryeministrit e Deputetëve.
Sipas kreut të Komisionit, Ulsi Manja, pretendimi i deputetëve për nivelet e pagave ishte mëse i arsyeshëm. Por nga ana tjetër ai argumentoi se pagat e mëdha do afronin në këtë institucion profesionistë të niveleve të larta dhe se aktualisht Shqipëria humbet pjesën dërrmuese të përplasjeve në gjykatat ndërkombëtare për shkak të mungesës së profesionalizmit të avokatëve.
Ligji i ri për Avokaturën e Shtetit parashikon që ky organ të marrë përsipër përfaqësimin e shtetit në të gjitha përplasjet gjyqësore brenda vendit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.