Surprizon propozimi i Schaeuble – Kërkon që anëtarët në Lindje të përdorin ESM për investime
Ministri gjerman i Financave, Wolfgang Schaeuble, po punon mbi një propozim që do të lejojë vendet lindore të Eurozonës të përdorin fondin e shpëtimit të bllokut të valutës së përbashkët, për të nxitur investimet në periudha të recesionit.
Sipas raportimit të Bild, plani do të sjellë një ndryshim të madh të politikës për Schaeuble, i cili ka kundërshtuar gjithmonë transfertat nga vendet e pasura të Eurozonës në anëtarët më të varfër si Greqia.
Gjermania është kontribuesi më i madh i Mekanizmit Europian të Stabilitetit, fondit të shpëtimit të Eurozonës.
Bild raportoi se Schaeuble synon ta bëjë propozimin pas zgjedhjeve më 24 Shtator, ku konservatorët e tij të udhëhequr nga kancelarja Angela Merkel pritet të fitojnë.
Në këmbim për aksesin më fleksibël ndaj ESM, Schaeuble kërkon që fondi të ketë më shumë fuqi mbi borxhin dhe buxhetet kombëtare. Bild shtoi se propozimi ishte një gjest miqësie ndaj Presidentit francez Emmanuel Macron, i cili ka premtuar të bashkëpunojë me Merkel për integrimin e mëtejshëm të Eurozonës.
Schaeuble ka thënë më herët gjatë këtij viti se e mbështet këndvështrimin e Macron, se transfertat financiare nga vendet e pasura te ato të varfra, janë të nevojshme brenda Eurozonës.
Një buxhet dhe ministër i Financave i përbashkët janë ndër idetë për integrimin e mëtejshëm të Bashkimit Europian, pas daljes së Britanisë nga unioni në 2019-ën. Përfundimi i unionit bankar është propozuar gjithashtu.
Schaeuble nuk gëzon reputacion të mirë në vendet lindore të Eurozonës, veçanërisht në Greqi, për këmbënguljen e tij mbi masat shtrënguese në këmbim të programit të shpëtimit gjatë krizës së borxhit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.