Takim Shqipëri-Rusi në MZHETTS për forcimin e bashkëpunimit ekonomik

Delegacionet shqiptare dhe ruse kanë zhvilluar një takim pranë Ministrisë së Zhvillimit Ekonomik për të thelluar bashkëpunimin ekonomik mes dy vendeve.

Sektorët ku ka nevojë më të madhe për bashkëpunim u identifikuan ekonomia, tregtia, transporti, bujqësia dhe energjia, por u konstatua edhe një trend pozitiv në rritjen e marrëdhënieve mes Shqipërisë dhe Rusisë.

Zëvendësministrja e MZHETTS, Adela Karapici foli për potencialet që ofron Shqipëria si në investimet në infrastrukturë, në industrinë nxjerrëse, por edhe në turizëm.

Nga ana e tij zëvendësministri i Parë i Drejtësisë së Federatës Ruse Sergey Gerasimov, njoftoi për interesin e madh të kompanive ruse për të investuar në vend, sidomos në fushat e energjitikës, transportit dhe turizmit.

Gerasimov u shpreh se Rusia ka interes të nisin fluturimet Charter të turistëve rusë për të pushuar në Shqipëri. Ndërsa zv/ministrja konfirmoi nisjen e procedurave për heqjen sezonale të vizave ndaj shtetasve rusë, nga muaji maj deri në muajin tetor, por kërkoi reciprocitet në këtë drejtim dukë i kërkuar edhe palës rusë të heqë vizat për shtetasit shqiptarë.

Takimi mes bashkëkryetarëve të Komisionit të Përbashkët Ndërqeveritar Ekonomiko-Tregtar dhe Tekniko-Shkencor “Shqipëri-Rusi”, i paraprin takimit të Komisionit të 7-të të Përbashkët Ndërqeveritar mes këtyre vendeve.

Volumi i mallrave të importuara nga Rusia në vitin 2016 ishte 10,9 miliardë lekë, ndërsa eksportet tona drejt saj kapën vlerën e 61 milionë lekëve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.