Takimi FMN-BB/Lagarde paralajmëron për luftë të valutave, bën thirrje për tregtinë
Shefja e Fondit Monetar Ndërkombëtar, Christine Lagarde, paralajmëroi kundër pjesëmarrjes në lutë të valutave dhe atë tregtare, duke thënë se këto do të cenojnë rritjen ekonomike globale.
Duke nisur në mënyrë formali takimin mes FMN dhe Bankës Botërore në Indonezi, Lagarde paralajmëroi vendet që të tërhiqen nga konflikti tregtar dhe të ndreqin rregullat e tregtisë në vend që t’i braktisin.
SHBA dhe Kina kanë vendosur tarifa në qindra miliardë dollarë mallra të njëra tjetrës. Aksionet në Azi prekën nivelin më të ulët në 19 muaj ditën e Enjte, duke ndjekur rëniet e mëdha në Wall Street një ditë më parë, kryesisht prej tensioneve tregtare si dhe rritjes së interesave në dollar.
“Nuk duam angazhimin në luftë tregtare apo luftë valute. Do të ishte negative për të gjithë pjesëmarrësit, por edhe për vende të treta, përfshirë ato që janë pjesë e zinxhirit të furnizimit të Kinës”, tha Lagarde.
Gjatë javës së fundit, Thesari në SHBA ka shprehur shqetësime mbi rënien e juanit kinez, ndërkohë që përgatit raportin për manipulimin e valutës.
Trump ka akuzuar gjithashtu Kinën për zhvlerësimin e vazhdueshëm të juanit për avantazh tregtar. Lagarde u përfshi në debat duke thënë se dobësia e juanit kinez vjen nga fuqizimi i dollarit, që ka marrë nxitje nga rritja e normave të interesit nga Rezerva Federale.
Juani ka pasur presione kundër dollarit këtë vit dhe ka humbur 8% nga muaji Mars deri në Gusht, kur u prezantuan edhe tarifat tregtare. Presidenti i Bankës Botërore, Jim Yong Kim paralajmëroi gjithashtu për luftën tregtare, duke thënë se axhenda e Bankës Botërore varet nga flukset e forta tregtare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.