Takimi i G7-ës në Francë – Përplasje Paris-Uashington për taksën digjitale
Ministrat e Financave të G7-ës janë mbledhur në takimin 2-ditor që zhvillohet në qytetin verior të Francës, Chantilly. Bisedimet janë fokusuar në mosmarrëveshjet lidhur me taksën për shërbimet digjitale, midis Francës dhe Shteteve të Bashkuara të Amerikës. Ndërkohë, që Franca po përdor presidencën e G7-ës për të ndihmuar në luftën kundër pabarazisë, ministri i financave, Bruno Le Maire, ftoi homologët e tij nga Gjermania, Italia, Japonia, Mbretëria e Bashkuar, Shtetet e Bashkuara dhe Kanadaja të bëjnë më shumë mbi këtë çështje.
Në datën 11 korrik, Parlamenti i Francës miratoi taksën e re ndaj kompanive më të mëdha digjitale në botë me shitje globale prej mbi 750 milionë euro dhe shitje në Francë prej të paktën 25 milionë euro. Kjo e ka bërë Francën një ndër vendet e para në botë që aplikon taksë ndaj gjigantëve digjitalë si Google, Apple, Facebook dhe Amazon, duke sfiduar kërcënimet e Uashingtonit për të nisur një hetim që mund të çojë në tarifa më të larta për importet franceze, nëse palët nuk arrijnë një marrëveshje. Ministri francez i financave, Le Maire tha se vendi i tij nuk do të tërhiqet nga ky vendim, pavarësisht kërcënimeve të Shteteve të Bashkuara.
“Nuk do ti kursejmë përpjekjet për të arritur një marrëveshje mbi taksën e shërbimeve digjitale gjatë takimit të G7-ës dhe të hedhim themelet për të gjetur një marrëveshje më të gjerë mes vendeve anëtare të OECD-së. Pavarësisht qëndrimit të ashpër të Shteteve të Bashkuara, ne nuk do të tërhiqemi nga kjo taksë, pasi është një vendim i popullit francez, i miratuar përmes parlamentit”, tha Le Maire. Megjithatë, analistët mendojnë se, me shumë mundësi, nuk do të ketë një marrëveshje mes Francës dhe Shteteve të Bashkuara, pasi mosmarrëveshja mes tyre është shumë e dukshme.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.