Takimi Johnson-Varadkar – “Mund të arrihet marrëveshja e Brexit deri më 31 Tetor”

Marrëveshja për Brexit mund të arrihet deri në fund të muajit Tetor, sipas Kryeministrit të Irlandës Leo Varadkar, që kishte biseduar me Boris Johnson. Ndërkohë që vetëm 3 javë kanë mbetur përpara daljes së Britanisë nga Bashkimi Europian, është ende e paqartë nëse do të arrihet apo jo një marrëveshje.

Kryeministri Boris Johnson takoi Varadkar gjatë javës, në përpjekje për të shmangur divorcin e ashpër apo vonesën e Brexit. “Mendoj se është e mundur që të arrijmë një marrëveshje dhe lejojmë daljen e rregullt nga Bashkimi Europian”, tha Varadkar.

Në një deklaratë të përbashkët, dy liderët thanë se shohin një shteg që çon drejt marrëveshjes dhe se shefi i negociatave në Bruksel Michel Barnier do të takohet me homologun britanik Steve Barclay në fundjavë.

Paundi u rrit ndjeshëm me 1.5% në 1.2387 kundër dollarit amerikan pas lajmit dhe qëndron në 1.2502 në sesionin e fundit tregtar të Javës. Për të arritur marrëveshjen, Johnson duhet të zgjidhë çështjet e kufirit me Irlandën përpara se të marrë miratim nga Europa e ta shesë më vonë dakordësinë në parlamentin britanik, ç’ka është parë deri më tani si e pamundur.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.