Takimi me Xi Jinping, Trump: Nuk do të ndodhë përpara afatit të 1 Marsit
Presidenti i Shteteve të Bashkuara tha se nuk planifikon të takojë presidentin kinez Xi Jiping përpara datës 1 Mars të caktuar nga të dy vendet si afat për arritjen e një marrëveshjeje mbi tregtinë.
Komentet konfirmuan lajmërimet nga zyrtarë të administratës, që kishin thënë se presidentët nuk pritej të takoheshin përpara datës 1 Mars, duke ulur pritshmëritë e një pakti të shpejtë tregtar.
Në fund të vitit të kaluar, Trump dhe Xi Jinping ranë dakord në Argjentinë për një armëpushim prej 90 ditësh në luftën tregtare, që të kenë mundësinë për të negociuar një marrëveshje.
Nëse konfliktet nuk zgjidhen, Trump ka kërcënuar rritjen e tarifave ndaj mallrave kinezë të importit.
Trump, që është krenar për marrëdhënien e mirë me Xi Jinping, kishte thënë javën e kaluar se do takojë përsëri presidentin kinez për të arritur një marrëveshje përfundimtare, pasi zv/Kryeministri kinez Liu He, prezantoi ftesën e Xi Jinping te Shtëpia e Bardhë.
Këshilltarët e Trump shqetësohen se nëse pranojnë një ftesë për takim në këtë fazë, do të shtoheshin pritshmëritë për një dakordësi të shpejtë, ndërkohë që të dyja palët kanë ende çështje të mëdha të pazgjidhura.
Presidenti pritet të udhëtojë në Azi në fund të këtij muaji për një samit me liderin e Koresë së Veriut, Kim Jong Un në Vietnam dhe disa spekulonin se ai do të takonte Xi Jinping në të njëjtin udhëtim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.