Kosova ende pa qeveri / Takimi i fundit Mustafa – Kurti përsëri nuk prodhon marrëveshje. Partitë kanë edhe 8 ditë kohë
Takimi i sotshëm ndërmjet Lëvizjes Vetëvendosje dhe Lidhjes Demokratike së Kosovës ka përfunduar sërish pa marrëveshje për një koalicion qeverisës.
Dy liderët e partive, Mustafa dhe Kurti janë takuar në ambientet e Kuvendit të Kosovës rreth orës 16:30, duke qëndruar për rreth dy orë brenda dyerve të mbyllura.
Në përfundim të takimit asnjëri nga liderët nuk preferoi të prononcohej për mediat, mirëpo ka qenë Lëvizja Vetëvendosja përmes një postimi në Facebook që ka njoftuar se në takim nuk ka pasur marrëveshje.
Ky subjekt ka njoftuar se takimin e radhës do ta mbajë nesër, ku prezent do të jenë edhe ambasadorët e QUINT-it:
“Sot pasdite, në Kuvendin e Kosovës u mbajt edhe një takim ndërmjet LVV dhe LDK.
Nuk u arrit marrëveshja. Palët u pajtuan që nesër të zhvillohet një takim tjetër bashkë edhe me ambasadorët e Quint-it në Prishtinë si dhe me Shefen e Misionit të BE-së.
Kanë mbetur edhe tetë ditë deri në skadimin e afatit kushtetues për koalicionin qeverisës”. – shkruhej në njoftim.
Të dy partitë me shumicë votash në zgjedhjet e tetorit në Kosovë nuk po ia dalin të gjejnë gjuhën e përbashkët për formimin e qeverisë, teksa përplasja midis dy subjekteve është zhvendsour tashmë tek pozicioni i Kryetarit të Kuvendit, ku LDK-ja pretendon se Glauk Konjufca i Vetëvendosjes duhet të hiqet, për t’i lënë vendin një prej anëtarëve të Lidhjes.
Kjo ofertë nuk pranohet nga Vetëvendosje, që si kundër-ofertë i ka ofruar LDK-së një numër më të lartë ministrish në kabinetin qeverisës, rolin e zv.kryeministrit dhe të kryetarit të dytë të Kuvendit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.