Taksa e pronës, ja çmimet referuese për çdo qytet – Kush paguan më shumë apo më pak
Zbatimi i takës së re mbi pasuritë e paluajtshme pritet të nisë gjatë këtij viti. Formula e ndryshuar për llogaritjen e detyrimit ka futur në ekuacion edhe vendndodhjen e pronës, e cila shërben si bazë për të llogaritur çmimin bazë për metër katror.
Nëse më parë ju paguanit për banesën tuaj në bazë të formulës: metër katror x 30 lekë, tashmë do të paguani metër katror x çmimi m2 x 0.0005.
Kjo do të thotë se nëse çmimi minimal fiskal i metrit katror në banesën tuaj është më i lartë se 60 mijë lekë, atëherë ju do të paguani më shumë se çfarë keni paguar më parë. Në të kundërt, nëse çmimi i referencës për qytetin apo zonën tuaj është nën 60 mijë lekë për metër katror, atëherë ju do të paguani më pak se me taksën e vjetër.
Kështu, banorët e Tiranës, me përjashtim të zonave 4/2 (Kinostudio) dhe 3/2 (Porcelani) do të paguajnë më shumë. Më shumë do të paguajnë edhe banorët e Durrësit, Vlorës dhe Njësisë Administrative Farkë në bashkinë e Tiranës. Për pjesën tjetër të vendit, taksa e pronës do të rezultojë e ulur.
Megjithatë, prona nuk do të vlerësohet vetëm në bazë të këtij çmimi referues. Udhëzimi i Këshillit të Ministrave tregon se prioritet do të kenë vlera e vetëdeklaruar nga taksapaguesi apo vlera e transaksionit nëse është bërë një shitblerje vitet e fundit. Për të mësuar më tepër mbi mënyrën se si do të veprohet për banesat, mund të lexoni artikullin më poshtë:
Taksa e re e pronës, ja si do të bëhet vlerësimi i bazës së taksës – Verifikim në terren për çdo ndërtesë
E njëjta llogaritje mund të bëhet në rastin e njësive tregtare, të cilat aktualisht paguajnë m2*400 lekë. Me metodologjinë e re të taksimit, bizneset do të paguajnë më pak kur çmimi minimal fiskal i njësisë është nën 267 mijë lekë. Për çdo vlerë sipër saj, njësitë tregtare do të paguajnë më tepër se aktualisht.
Nëse zotëroni një ndërtesë që përdoret për veprimtari prodhimi, taksa aktuale është m2*200 lekë. Me formulën e re, ju do të paguani më pak nëse çmimi fiskal i njësisë tuaj është nën 133 mijë lekë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.