Taksat dhe tarifat arrijnë në kuvend – Rriten gjobat për bizneset, lehtësi për automjetet luksoze
Paketa fiskale për vitin e ardhshëm është depozituar në Kuvend, për tu diskutuar gjerësisht në komisione. Një ndër projektligjet që do të diskutohet është ai për procedurat tatimore, i cili harmonizohet në kuadër të projektit të fiskalizmit dhe parashikon gjoba në rritje e progresive, në rastet kur bizneset kapen në shkelje.
Ndërsa sa i takon lehtësive fiskale, në diskutim do të jetë edhe projektligji për tatimin mbi të ardhurat, i cili parashikon incentivimin e sektorit të industrisë automotive duke caktuar normën e tatim fitimit 5% për personat juridikë që ushtrojnë veprimtari ekonomike në këtë industri; promovimin e sportit me qëllim rritjen e impaktit pozitiv të tij në shoqëri.
Për personat juridikë, të cilët realizojnë fitim vjetor të tatueshëm mbi 100 milionë lekë, shumat e sponsorizuara në fushën e sportit, të njohura si shpenzime të zbritshme, për efekt të llogaritjes së tatimit mbi fitimin, janë të zbritshme sa trefishi i shumës së sponsorizuar; • mbartjen e humbjeve për një periudhë 5-vjeçare për tatimpaguesit, që investojnë në projekte biznesi, me vlerë mbi 1 miliard lekë.
Po ashtu, parashikohen ndryshime edhe në ligjin për taksat kombëtare, që synon lehtësi në uljen e taksimit për automjetet luksoze, rritjen e komisionit për agjentët e taksave dhe ndryshime në pagesën e penaliteteve. Ndryshimet pritet të hyjnë në fuqi më 1 Janar 2020.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.