Taksat që ndryshojnë në Tiranë-Kush do të paguajë më pak dhe kush më shumë vitin e ardhshëm

Tirana nuk do të ketë ndryshime të mëdha në taksa për vitin e ardhshëm. Këshilli Bashkiak i kryeqytetit, bashkë me buxhetin, ka miratuar dhe pakëten fiskale, e  cila vjen me dy ndryshime.

Konkretisht,  në paketën fiskale të vitit 2020, janë parashikuar ndryshime në taksën e përkohshme për infrastrukturën arsimore, për të cilën është menduar të diferencohet, kategoria biznes i vogël me xhiro 0-2 milionë lekë, për të lehtësuar barrën fiskale të saj.

Për këtë arsye parashikimi i të ardhurave për 2020 e në vijim afektohet me ulje rreth 50 milionë lekë krahasimisht me vitin 2019, dhe në total në 2020, parashikohet të mblidhen 813 milionë lekë. Për të gjitha kategoritë e tjera niveli i taksës nuk pëson ndryshime.

Ndërsa  është rishikuar tarifa për pastrimin dhe largimin e mbeturinave. Sipas relacionit të paketës fiskale,  në bazë të analizës së kostos së shërbimit të pastrimit dhe përpunimit te mbetjeve është evidentuar një diferencë e theksuar mes kostos së shërbimit dhe të ardhurave të arkëtuara për mbulimin e tij. Ky ndryshim është ndikuar kryesisht për shkak të hyrjes në fuqi të kontratës së inceneratorit në vitin 2018 , në bazë të PPP të realizuar nga Qeveria Shqiptare dhe që po zbatohet nga Bashkitë e qarkut të Tiranës.

Gjithashtu një rritje e konsiderueshme vërehet edhe në koston operative vjetore të Bashkisë Tiranë për menaxhimin e këtij shërbimi.

Për këtë arsye, Bashkia Tiranë ka vlerësuar sit ë  nevojshme rishikimi i nivelit të tarifës për të gjitha kategoritë, familjarët dhe subjektet tregtare,  në mënyrë që të lehtësohet mbulimi i kostove të cilat janë në rritje çdo vit, pa arritur mbulimin total të saj, dhe në mënyrë të tillë që të mos ketë një rritje të theksuar në barrën fiskale të kategorive duke synuar një shpërndarje të drejtë të kësaj barre në përputhje me impaktin që secila prej këtyre kategorive mbart.

Nga tarifa e pastrimit, planifikimi është 17 për qind më i lartë se në 2019 dhe parashikohet të arkëtohen afro 2.2 miliardë lekë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.