Taksë formale për qumështin pluhur – Fabrikat përjashtohen nga detyrimi për ta paguar

Ministria e Financave parashikon vendosjen e një takse prej 100 lek/kg për qumështin  pluhur për tregti. Ky propozim i bërë në paketën fiskale, sipas relacionit të ndryshimeve në ligjin ëpr “Taksat Kombëtare”  synon që të incentivojë prodhimin  dhe tregtimin në vend të qumështit, me synim mbështetjen e fermerëve vendas.  Iniciatva mbështetet në argumentin se, sektori i prodhimi i qumështit ka pësuar rënie gjatë viteve të fundit. Konkretisht sipas relacionit, prodhimi i qumështit në vitin 2020 ka shënuar një rënie me 5,39 %, në krahasim  me vitin 2019.

Gjithashtu, rënie ka pësuar dhe sasia e qumështit të grumbulluar me 14,8.  Ndërkohë, vihet re një rritje në produktet që importohen për prodhimin e  produkteve të bulmetit, ndër të cilët mjaft i rëndësishëm është qumështi pluhur.  Kështu, sasia e importuar e këtij produkti për vitin 2020 ka qenë në masën mbi  1.400 ton/vit, sasi kjo rreth 2.5 herë më e lartë krahasuar me atë të vitit 2016 që  ka qenë rreth 560 ton/vit.

Qumështi pluhur përdoret në agroindustri (shpesh përzihet me qumësht të freskët) për të prodhuar produkte bulmeti, pjesërisht për të përballuar kostot e qumështit të freskët dhe pjesërisht për të mbuluar mungesat/hendekun ndërmjet sezonalitetit të kërkesës nga njëra anë dhe të ofertës së qumështit të freskët (të papërpunuar) në anën tjetër. Në këtë kuadër propozohet dhe vendosja e taksës për hirrë qumështi në vlerën  150 lekë për kg dhe ajo e taksës për krem qumështi në vlerën 150 lekë për litër.

Gjithashtu, përcaktohet dhe taksa për pijen e homogjenizuar në vlerën 16 lekë  për litër. Por ajo që është jo normale në këto ndryshime, ka të bëjë me faktin se projektligji citon se “Përjashtohen nga pagimi i taksës për qumështin pluhur, taksës për hirrë  qumështi dhe taksës për krem qumështi fabrikat e prodhimit me etiketë të  miratuar nga Autoriteti Kombëtar i Ushqimit.” Në këtë pikë, a ka vlerë kjo iniciativë kur blerësit kryesor të këtyre produkteve janë vetë fabrikat? Kush do ta paguajë këtë taksë?

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.