Taktika e re e Kinës për të luftuar koronavirusin: Dhurata dhe para në dorë për qytetarët

Kina është vendi nga ku u shfaq koronavirusi për herë të parë. Për shkak të kapaciteteve të saja logjistike, shteti komunist pati mundësinë të organizojë shpejt karantinë të detyrueshme për të gjithë qytetarët.

Deri më tani ecuria e koronavirusit në Kinë ka qenë e mirë, siç raportohet zyrtarisht, krahasuar me shumë vende të tjera perëndimore, si Gjermania, Franca, Britania apo SHBA. Por edhe pse Kina numëron ditët e fundit mesatarisht 45 raste të reja në ditë, autoritetet atje janë shqetësuar se festimi i Vitit të Ri Hënor mund të shkaktojë një valë tjetër pandemie, me miliona qytetarë që udhëtojnë për t’u takuarme  familjarët apo miqtë e tyre.

Viti i Ri Hënor është festa më e rëndësishme e Kinës, dhe shpesh emërtohet si migrimi i brendshëm më i madh në botë, me miliona njerëz që zhvendosen nga qyteti në qytet.

Në pamundësi për të imponuar një karantinim të plotë, i cili do ishte i dëmshëm për ekonominë, autoritetet kineze kanë gjetur një mënyrë të re si t’i bindin qytetarët të respektojnë rregullat e distancimit social dhe të mos udhëtojnë përgjatë festimeve.

Autoritetet kanë vendosur që nëpërmjet një aplikacioni që gjurmon vendodhjen e çdo njeriu, t’i japi qytetarëve që zgjedhin të mos lëvizin për festën, dhurata ushqimore, kupona nëpër dyqane, internet falas 4G, apo dhe para direkte. Nëse qytetari nuk lëviz, atëherë ai shpërblehet nëpërmjet aplikacionit me një nga dhuratat e mësipërme.

D.B – SCAN
Burimi: Wall Street Journal

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.