Talebanët shpallin fitoren në Panjshir – Përfundojnë marrjen nën kontroll të vendit pas tërheqjes së trupave të huaja
Talebanët kanë shpallur fitoren ndaj forcave kundërshtare në luginën Panjshir në Verilindje të Kabulit ditën e Hënë, duke përfunduar marrjen nën kontroll të shtetit, pas tërheqjes së trupave të huaja. Fotot në mediat sociale shfaqën talebanë që qëndronin përballë portës së ndërtesës së guvernatorit të provincës, pasi luftuan gjatë fundjavës me Frontin Kombëtar të Rezistencës së Afganistanit (NRFA), të drejtuar nga lideri Ahmad Massoud.
“Provinca e Panjshir ka rënë plotësisht në kontrollin e Emiratit Islamik të Afganistanit”- tha zëdhënësi i grupit islamik, Zabihullah Mujahid në Twitter, duke shtuar se disa armiq ishin vrarë në betejë dhe të tjerë ishin larguar. “Me këtë fitore, vendi ynë ka dalë nga vorbulla e luftës dhe njerëzit tanë do të kenë një jetë të lumtur në paqe dhe liri në të gjithë vendin”- shkruan ai në twitter. Talebanët siguruan banorët e Panjshir, që janë etnikisht të ndarë nga talibani që mbizotërohet nga pashtunët, se nuk do të ketë “akte diskriminuese kundrejt tyre”. “Ata janë vëllezërit tanë dhe do punojmë për një qëllim të përbashkkët të mirëqënies së vendit” – tha Mujahid.
Nuk ka patur komente të menjëhershme nga Massoud, që drejton forcat e përbëra nga mbetjet e ushtrisë afgane dhe njësi të tjera, përfshirë luftëtarë lokalë. Ali Maisam Nazari, kreu i marrëdhënieve të jashtme i Frontit Kombëtar të Rezistencës, tha se shpallja e fitores nga talebanët është e rreme dhe se fuqitë opozitare po vazhdojnë të luftojnë. Talebanët bënë të ditur se forcat e tyre kanë hyrë në qendrën e provincës Bazarak dhe kanë marrë nën kontroll sasi të mëdha të armëve. Talebanët morën nën kontroll pjesën e mbetur të Afganistanit 3 javë më parë, duke hyrë në Kabul më 15 Gusht, pasi qeveria e mbështetur nga perëndimi u rrëzua dhe presidenti Ashraf Ghani u arratis nga vendi.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.