TAP: Nuk ka plan “B” – Projekti në kohë, në Shqipëri nuk do të ketë ndryshime

Gazi azer do të arrijë në Itali, e më pas në të gjithë Europën që prej fillimit të vitit 2020, siguroi presidenti i konsorciumit trans-adriatik, Walter Paaraer në një intervistë për Reuters.

Gazsjellësi transadriatik që kalon mes përmes Shqipërisë po has probleme aspak të vogla në hallkën e tij të fundit, dhe më të vogël, me një gjatësi prej vetëm 8 kilometrash, në Itali.

Protestat e shumta e kanë pamundësuar vijimin normal të punimeve, paçka se ka disa vendime gjykatash që i kanë dhënë fund polemikave një herë e përgjithmonë.

Protestat e shumta, edhe të autoriteteve lokale, në provincën e Leçes, për ta zhvendosur gazsjellësin më në veri kanë ngritur shqetësime të shumta se kjo do të pamundësojë përfundimin në kohë të projektit.

Por, vetë presidenti e ka hedhur poshtë diçka të tillë. Mbarimi në kohë i gazsjellësit është nënvizuar shpeshherë edhe nga Bashkimi Europian që kërkon që të ulë varësinë nga gazi rus.

Në Shqipëri ndërkohë, punimet janë në linjë të plotë me pritshmëritë dhe duket se gjithçka do të përfundojë brenda afateve.

Pjesa e vetme e projektit, ende e pafilluar dhe që do të zejë pjesën kryesore të punimeve gjatë dy viteve të ardhshme është ajo në shtratin e detit Adriatik, nga ku do të bëhet edhe lidhja mes Shqipërisë dhe Italisë.

Presidenti i konsorciumit siguroi se, nuk ka një plan B. “Nuk është një opsion rikonfigurimi i rrugëtimit të gazsjellësit në Shqipëri”, nënvizoi ai.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.