TAP shtrin tubat e para në ujërat shqiptare – Konsorciumi: Vijon puna edhe për instalimin e fibrës optike
Është realizuar me sukses tërheqja në breg e tubacionit të parë nënujor e Gazsjellësit Trans Adriatik që shtrihet në Shqipëri. Këtë e ka bërë të ditur vetë konsorciumi i projektit, sipas të cilit pas saldimit, është bërë edhe testimi dhe ulja e tubaciont në shtratin e detit.
“Saipem, kontraktori i TAP përgjegjës për inxhinierinë, prokurimin, ndërtimin dhe instalimin e seksionit detar, po përdor për këtë proces anijen Castoro 10. Tubat u salduan në bordin e anijes, e cila ndodhej 1.4 km nga bregu i detit. Saldimet më pas u testuan dhe tubacioni u ul në shtratin e detit. 1.8 kilometrat e para të tubacionit të salduar u tërhoqën drejt bregut, në pikën e daljes në det në afërsi të Fierit.”
Ndërkohë konsorciumi njofton se vijon puna për shtirjen e tubacionin në ujërat e cekët, instalimin e fibrës optike si dhe për mbulimin e tubacionin në det dhe në breg. Punimet për seksionin detar të TAP në vendin tonë filluan në tetor të vitit të kaluar. Sa i takon seksioni detar të TAP që bashkon bregun shqiptar me atë italian, gjatësia e tij është 105 km.
Pika më e thellë e gazsjellësit do të jetë më shumë se 810 metra nën nivelin e detar dhe për ndërtimin e seksionit detar do të përdoren rrej 9000 tuba, pesha e të cilëve shkon deri në 100 000 tonë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.