Tarifa e përbashkët europiane – BE financon 1,8 milion euro për doganat shqiptare

Sistemi i Informacionit të doganave shqiptare së shpejti do të jetë pjesë e rrjetit të doganave europaine. Bashkimi Europian nëpërmjet një projekti binjakëzimi, që kap një vlerë financiare prej 1.8 milion euro, synon përgatitjen e doganës shqiptare për Sistemin e Menaxhimit të Tarifës së Integruar.

Zëvendësministri i financave, Ervin Mete, u shpreh gjatë ceremonisë së hapjes së këtij projekti, se modernizimi i sistemit do të bëjë të mundur lehtësimin e procedurave për biznesin, çka ndikon në rritjen e shkëmbimeve tregtare më vendet e BE.

Ndërsa Shefi i Operacioneve të Delegacionit të BE, në Shqipëri, Stepfen Strok, theksoi zgjerimin e aktivitetit të doganave përtej rolit të saj të mbledhjes së të ardhurave.

Agjencia Italiane e Doganave dhe Monopoleve do të mbështesë  vendin tonë  për zhvillimin e sistemeve të saj kombëtare për tu lidhur me Sistemet e Teknologjisë së Informacionit të BE për shkëmbimin e informacioneve.

TARIC është një bazë të dhënash në shumë gjuhë, në të cilën përmblidhen të gjitha masat që kanë të bëjnë me tarifat doganore dhe legjislacionin tregtar dhe bujqësor të BE.

Nga kjo përfitojnë operatorët ekonomikë ku transparenca “unifikon” të gjitha rastet e importeve dhe eksporteve të mallrave.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.