Tarifa e “Rrugës së Kombit”, abone për përdoruesit e shpeshtë – Subvencion për udhëtarët me autobusë dhe furgonë
Seanca e sotme parlamentare ka patur në qendër të debateve tarifat e reja që do të aplikohen në Rrugën e Kombit, të cilat variojnë nga 5 euro për automjetet deri në 23 euro për mjetet e rënda.
Banorët e Kukësit kanë kërkuar të përjashtohen nga pagimi i kësaj tarife, për shkak të shpeshtësisë së përdorimit të rrugës dhe faktit se do të rëndojë mbi xhepat e qytetarëve. Por kryeministri e ka hedhur poshtë këtë pretendim, pasi krijon precedent që në të ardhmen të kërkojnë përjashtim edhe banorët e rrugëve të tjera ku do të aplikohet pagesa.
Sipas Ramës, do të përcaktohet një mënyrë tjetër pagese për përdoruesit e shpeshtë.
“Kontrata parashikon që në 6 muajt e parë do të përcaktohet në negociata mes qeverisë, ministrisë përkatëse dhe koncensionarit, ajo që quhet tarifa për përdoruesit e shpeshtë. Pra, nëse dikush e përdor rrugën për të ardhur nga Kukësi në Tiranë, apo për të shkuar nga Tirana në Kukës shpesh, atëherë përdoruesit e shpeshtë do të kenë zgjedhje me karta ku do të paguajnë jo shumën e të gjithë udhëtimeve që bëjnë bazuar në tarifa fikse, por një tarifë më të ulët”, tha Rama.
Ndërkohë, kryeministri shtoi se do të ketë edhe një mbështetje financiare nga kompania koncesionare për Bashkinë e Kukësit, për të subvencionuar tarifat për përdoruesit e transportit me autobusë.
“Janë 120 mijë euro që kompania i jep pushtetit vendor për t’i përdorur për të lehtësuar barrën, duke e hequr plotësisht nga të gjithë ata që do përdorin transportin publik apo privat me autobusë, apo me furgonë, pra, ata nuk kanë asnjë tarifë për të paguar dhe nuk ka asnjë barrë mbi këdo që do përdorë këtë transport. Pagesa e kompanisë për bashkitë është pikërisht që të gjithë operatorëve që japin këtë shërbim, qofshin operatorë publikë që atje s’ka, por edhe operatorë privatë që kanë linja të dedikuara për të bërë transportin publik, kompenson dhe nuk i kërkon autobusit apo furgonit të paguajë kur kalon tollin”, shtoi kryeministri.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.