Tarifa koncesionare e Aeroportit të Sarandës – Shteti do marrë 2% të të ardhurave, mosmarrëveshjet për vlerën do zgjidhen në mirëbesim
Shteti shqiptar do të përfitojë 2% të të ardhurave vjetore bruto të aeroportit të Sarandës, në formën e një tarife koncesionare. Gjithçka përcaktohet në draft-kontratën që do të nënshkruhet mes Ministrisë së Infrastrukturës dhe Energjisë dhe kompanisë që do të shpallet fituese gjatë garës së koncesionit. Tarifa koncesionare do të paguhet në vitin e dytë të operimit të aeroportit, përmes dorëzimit të pasqyrave financiare, vërtetimeve bankare dhe Vërtetimit të Tarifës Koncesionare.
Ndërkaq, në rast se Ministria e Infrastrukturës dhe Energjisë, si autoritet kontraktor kundërshton Vërtetimin e Tarifës Koncesionare, atëherë draft-kontrata parashikon takim në mirëbesim me investitorin për t’u konsultuar dhe vendosur. Ndërkohë që, nëse palët nuk arrijnë dakordësinë atëherë mosmarrëveshjet do të zgjidhen në arbitrazhin e Londrës.
Gara koncesionare për ndërtimin e aeroportit të Sarandës u hap në datë 3 gusht, ndërsa do të qëndrojë e hapur deri në datën 23 shtator. Sipas dokumenteve, kontrata do të ketë një kohëzgjatje 35-vjeçare, ndërkohë që vlera e parashikuar e investimit është 34.32 mln euro. Ky investim do të kryhet nga kompania që do të shpallet fituese në garë, ndërkohë që pas projektimit, ndërtimit, operimit dhe mirëmbajtjes, në përfundim të periudhës 35-vjeçare do të bëhet transferimi i veprës aeroportule pranë organeve shtetërore.
Ndërkaq, në kërkesat specifike, theksohet se koncesionari do të sigurojë që Terminali, pas fillimit të operacioneve dhe para fillimit të zgjerimit të tij, duhet te akomodoje jo me pak se 130 000 pasagjerë në vit. Ndërkohë që, pas vitit të pestë të operimit, pritet që numri i pasagjerëve të rritet në 300 mijë në vit, ndërsa pas 10 vitesh, në 700 mijë në vit. Sipas autoriteteve, aeroporti i Sarandës do të ketë kryesisht profilin e një aeroporti turistik, që funksionojnë zakonisht 7-8 muaj në vit, por ai mund të shërbejë edhe përtej sezonit për fluturime të brendshme.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.