Tarifat e celularëve – Tre kompani bashkohen kundër AKEP në Gjykatë

Tre kompani celulare në vend janë bashkuar kundër një vendimi të Autoritetit të Komunikimeve Elektronike dhe Postare duke kërkuar që përveç shfuqizimit të ketë edhe rregullim të pasojave.

Çështja që ka përfunduar në Gjykatën Administrative lidhet me një vendim të 14 janarit 2016  i cili kishte në bazë monitorimin e efekteve të mos-diskriminimit të tarifave on-net/off-net dhe pezullimin e fillimit të efekteve të simetrisë së tarifave të terminimit në rrjetet celulare.

Por çfarë ka ndodhur saktësisht. Në një strategji të shtrirë në disa vite AKEP vendosi që të orientonte tarifat e kompanive celulare drejt kostos çka u lejonte kompanive çdo vit të ulnin tarifat duke ruajtur një marzh normal fitimi.

E favorizuar në shtrirjen kohore do të ishte kompania Plus Communication duke qenë se kishte më pak kohë në treg. Tarifat e saj i janë nënshtruar uljes më të moderuar nëse e krahasojmë me kompanitë e tjera.

Por të paktën në vitin 2016 kompanitë duhet të kishin tarifa simetrike. Plus nga ana e tij kërkoi shtyrjen e afatit  deri në janar 2017 për një tarifë terminimi tjetër nga ajo e operatorëve të tregut që në këtë rast ishte 1.48 lekë për minutë në rrjet.

Ka qenë pikërisht kjo arsyeja që ka çuar operatorët Vodafone, Telecom dhe Albtelecom që të kërkojnë pezullimin e këtij vendimi dhe shlyerjen e gjithë pasojave të shkaktuara prej tij.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.