Tarifat e juristëve për ndihmën juridike falas. Avokatët, pagesa deri në 96 mijë lekë nga shteti për dosjet e SPAK, 60 mijë lekë në Gjykatën e Lartë

Ministria e Drejtësisë ka miratuar tarifat me te cilat do të paguahen avokatët që do të ofrojnë ndihmë jurdike falas për personat që nuk mund të sigurojnë vetë përfaqësim ligjor nëpër gjykata. Përmes një udhëzimi ajo ka përcaktuar kriteret e përfitimit të pagesave dhe tarifën e shpërblimit për avokatët që ofrojnë ndihmë juridike dytësore, në përputhje me ligjin nr. 111/2017 “Për ndihmën juridike të garantuar nga shteti”.

Tarifat më të larta do të përfitohen nga avokatët për dosjet e SPAK në Gjykatën e Posaccme Kundër Krimit të Organizuar e Korrupsionit, por edhe në Gjykatën e Lartë. Në këtë rast, avokatët do të përfitojnë 96 mijë lekë, afërsisht 1 mijë dollarë. Për krimet që parashikojnë dënime të rënda me burg mbi 10 vite, avokatët do të përfitojnë nga shteti 80 mijë lekë. Ndërkohë që përfaqësimet në Gjykatën e Lartë do të paguhen nga shteti me 60 mijë lekë.

Me përfundimin e procedurave të dhënies së ndihmës juridike, avokati duhet të paraqesë pranë Drejtorisë së Ndihmës Juridike Falas formularin për shpërblimin, për ndihmën e ofruar, në përputhje me kontratën vjetore të lidhur midis avokatit dhe kësaj drejtorie.

Lorenc Rabeta / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.