Tarifat e SHBA ndaj Francës – Shitësit amerikanë të verës i tremben. Thonë se nuk do i përballojnë

Konsumatorët, kompanitë dhe punëtorët amerikan do paguajnë çmimin më të madh për tarifat prej 100% ndaj shampanjës, djathit dhe çantave të dorës nga Franca, sipas analistëve. Zyra e Përfaqësuesit të Tregtisë në SHBA, propozoi muajin e kaluar tarifa ndëshkuese ndaj 2.4 miliardë dollarë mallra francez të importit, përfshirë shampanjën dhe produkte të tjera, në kundërpërgjigje të taksës franceze për shërbimet dixhitale, që sipas hetimeve do të dëmtojë firmat amerikane.

Grupi tregtar që përfaqëson shitëesit me shumicë të verës dhe pijeve alkoolike (WSWA) vlerësoi se tarifat në 100% të propozuara ndaj shampanjës franceze, do të reduktojnë shitjet totale të verës në  SHBA me 2%, ç’ka do të sjellë një humbje në vendet e punës prej 17,000 personash dhe një kosto për ekonominë prej 2 miliardë dollarë. Presidenti i Shteteve të Bashkuara, Donald Trump, i sheh tarifat si një mjet efektiv për të tërhequr shtetet në tryezën e negociatave.

Megjithatë, analistët thonë se këto tarifa po ngadalësojnë ekonominë dhe manifakturën amerikane dhe në të gjithë botën. Aktualisht, ekzistojnë tarifa prej 25% ndaj verës dhe shumë produkteve të tjera europiane, në kundërpërgjigje të subvencioneve të Bashkimit Europian për avionët Airbus. Analistët thonë se shitësit po përpiqen të mbrojnë konsumatorët nga tarifat prej 25% dhe shtojnë se kjo do të jetë e pamundur nëse ato rriten në 100%. Shtetet e Bashkuara përbëjnë tregun më të madh të eksportit për verën franceze.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.