Tarifat për rimorkim në porte – Urdhri i 2 ministrave: Sa do paguajnë anijet e mallrave dhe pasagjerëve
Në prag të çeljes zyrtare të sezonit veror Ministri i Infrastrukturës dhe Energjisë dhe ai i Financave dhe Ekonomisë kanë përcaktuar tarifat që do të duhet të paguajnë anijet e mallrave dhe udhëtarëve për rimorkimin në Portet Detare. Referuar urdhrit të përbashkët çmimet variojnë sipas tonazhit të anijes, ndërkohë që në varësi të llojit dhe ditëve do të aplikohen ulje ose rritje tarifash.
Kështu, anijet deri në 1000 ton kufiri maksimal i vendosur është 150 euro, ndërsa me rritjen tonazhit rriten edhe tarifat e vendosura. Tarifa më e lartë do të paguhet për anijet nga 20001 GT deri në 25000 GT, që është 1300 euro, ndërsa për anijet me tonazh më të lartë se kaq, për çdo 5000 GT do të aplikohet 200 euro shtesë.
Ndërkaq, për rimorkimin e anijeve “RO-RO”, që përfshin anijet për automjetet e mallrave apo udhëtarëve do të aplikohet zbritje në masën 20%, ndërsa për anijet e ngarkuara me mallra të rrezikshme dhe karburante do të aplikohet rritje me 20% e tarifës bazë.
Ndërkohë që, tarifat e përcaktuara në këtë urdhër përfshijnë kohën kur shërbimet kryhen nga ora 07:00 deri në orën 17:00. Kur shërbimet kryhen nga ora 17:00 deri në orën 07:00, ditëve të diela dhe festave zyrtare do aplikohet një shtesë prej 50% mbi tarifën bazë. Tashmë urdhri i 2 ministrave është publikuar në fletoren zyrtare dhe ka marrë fuqi ligjore.
Ola Mitre/SCAN
Kufiri maksimal i tarifës së rimorkimit që do të përdoren në Portet Detare në Republikën e Shqipërisë
Për anijet deri dhe përfshirë 1000 GT 150 euro
Për anijet nga 1001 deri 2000 GT 200 euro
Për anijet nga 2001 deri 3000 GT 350 euro
Për anijet nga 3001 deri 5000 GT 500 euro
Për anijet nga 5001 deri 7000 GT 600 euro
Për anijet nga 7001 deri 10000 GT 760 euro
Për anijet nga 10001 deri 15000 GT 950 euro
Për anijet nga 15001 deri 20000 GT 1100 euro
Për anijet nga 20001 deri 25000 GT 1300 euro
Për anijet mbi 25000 GT, për çdo 5000 GT 200 euro shtesë mbi vlerën 1300 euro
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.