Tarifat përmbarimore – Ministri Ahmetaj premton uljen e tyre

Ministri i Financave, Arben Ahmetaj, premtoi të enjten zgjidhjen e shpejtë të ngërçit të krijuar mes bankave dhe shoqërive përmbarimore, për shkak të rritjes së lartë të tarifave.

Duke përsëritur edhe njëherë optimizmin për shëndetin e ekonomisë shqiptare, Ahmetaj tha gjatë Konferencës Vjetore të Bankës së Shqipërisë se ecuria e kreditimit ende nuk i përgjigjet ecurisë pozitive të treguesve të tjerë makro.

Sipas tij, legjislacioni për tregun financiar do të përmirësohet, ndërsa pengesat për mbledhjen e detyrimeve, siç mund të jenë tarifat e larta përmbarimore, do të korrigjohen.

Anulimi i udhëzimit për tarifat e reja përmbarimore u kërkua shprehimisht edhe në deklaratën e fundit të misionit të Fondit Monetar Ndërkombëtar.

Presidenti i Republikës, Ilir Meta në fjalën e tij gjatë Konferencës së Bankës së Shqipërisë, nuk ndau të njëjtin entuziazëm me Ministrin e Financave për gjendjen e ekonomisë shqiptare.

Sipas Presidentit, rritja në kufijtë e 4% është e pamjaftueshme dhe ekonomia vuan një diversifikim të ulët sektorial, çka shtron nevojën urgjente për reforma në shërbim të një modeli më të suksesshëm ekonomik.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.