Tashmë mund të ngarkoni video edhe në Linkedin
Linkedin është një nga rrjtetet më të përdorura për sa i përket bizneseve por gjithashtu edhe si një opsion ku individët mund të gjejnë punë.
Në fillim të këtij viti rrjeti social profesional kaloi nëpër një ridizenjim madhor, megjithatë shumica e përdoruesve nuk e përdorin çdo ditë siç bëjnë me Facebook dhe Twitter.
Por Linkedin ka një tjetër shans për tu provuar përdoruesve se mund të jetë rrjeti social i tyre i preferuar.
Tashmë kompania lançoi videot në platformën e saj.
Testimet të cilat filluan gjatë muajit të kaluar kulmuan ditën e djeshme ku përdoruesit mund të ngarkojnë video në rrjetin social. Edhe aplikacionet mobile në Android dhe iOS mund të ngarkojnë video, por ende mungon një opsion për transmetime live.
Në javët në vijim të gjithë përdoruesit do të kenë qasje në risinë më të re. Ata do të kenë në dispozicion mjete të cilat tregojnë jo vetëm numrin e komenteve, pëlqimeve dhe shikimeve por edhe të vendndodhjes së tyre, raporton PcWorld.
Mjetet analitike përmbajnë informacion edhe për kompanitë të cilat janë duke parë një video të caktuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.