Task-Forcë për koronavirusin – Masa edhe në Rinas. Manastirliu: Koordinojmë masat ndërmjet institucioneve

Pas rasteve të shtuara në Kinë dhe konfirmimit të disa rasteve të Evropë, ministrja e Shëndetësisë dhe Mbrojtjes Sociale Ogerta Manastirliu ka mbledhur Task-Forcën e institucioneve të shëndetësisë dhe ekspertëve për të koordinuar masat për koronaviurusin e ri.

Sipas ministres, Shqipëria mbetet një vend me rrezik të ulët përsa i përket depërtimit të koronavirusit të ri, por sipas saj po merret masa paraprake për mbrojtjen ndaj tij.

“Edhe pse Organizata Botërore e Shëndetësisë nuk ka shpallur emergjencë ndërkombëtare por vetëm emergjencë në Kinë për momentin, ne po përgatitemi me masa të shtuara në strukturat tona dhe dua të theksoj se kemi gati planet e emergjencës për reagimin ndaj infeksioneve virale, sipas shkallës së rrezikshmërisë”.

Ndërkaq, edhe pse Shqipëria nuk ka lidhje direkte ajrore me Kinën, bazuar në rekomandimet e OBSH-së, janë marrë masat përkatëse në aeroport. “Kemi rritur survejancën në aeroport dhe pikat kufitare me njësinë tonë të përhershme të shëndetësisë.

Janë shtuar masat higjieno-sanitare, është trajnuar stafi i Njësisë së Shëndetësisë në pikat kufitare dhe janë riaktivizuar protokollet përkatëse për situata të tilla”.  Task-forca  ka në përbërje drejtues të institucioneve shëndetësore, mjekë dhe ekspertë të shëndetit publik, drejtues të njësive tona në pikat e kalimit kufitar, përfaqësues të policisë kufitare.

Paralelisht me mbledhjen e parë koordinuese, Instituti i Shëndetit Publik dhe strukturat e tjera të shëndetësisë kanë përforcuar survejancën e infeksioneve të rënda respiratore akute në bashkëpunim me të gjitha spitalet e vendit. Po ashtu, është përgatitur përkufizimi i rastit, udhëzimet për survejancën, hetimin epidemiologjik dhe menaxhimin e rasteve në përputhje me Rregulloren Ndërkombëtare të Shëndetit.

Sipas ministrisë, ISHP ka një laborator të standardizuar në lidhje me vendosjen e diagnozës së koronaviruseve dhe infeksioneve virale dhe stafe të trajnuara për inteligjencën epidemike. Spitali infektiv ka kapacitetet e nevojshme me bokse izolimi për çdo situatë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.