Tatimet: 9 mijë individë kanë deklaruar të Ardhurat Personale për 2018
Drejtoria e Përgjithshme e Tatimeve njoftoi se pas përfundimit të afatit, më datë 30 Prill, për deklarimin e të ardhurave individuale vjetore, ka rezultuar se numri i individëve të cilët kanë përmbushur detyrimin ligjor, është rritur me 12% krahasuar me një vit më parë.
Sipas të dhënave të kësaj date-afat ligjor i deklarimit për periudhën tatimore 2018, kanë dorëzuar Deklaratën Individuale Vjetore të të Ardhurave rreth 9.000 individë subjekt deklarimi, ndërsa për vitin 2017 numri i deklaruesve ka qenë rreth 8.000.
DPT theksoi faktin se shuma e detyrimit të deklaruar për t’u paguar, si diferencë, për vitin 2018, është ndjeshëm më e lartë, rreth 75% më shumë, krahasuar me një vit më parë.
Ndryshe e thënë në shifra, shuma e deklaruar për t’u paguar është rreth 646 milionë lekë, ndërkohë që në 30.04.2018 ishte rreth 340 milionë lekë.
Sipas njoftimit, rritja e numrit të individëve që plotësojnë kushtet ligjore për deklarimin individual të të ardhurave personale, reflekton kuptimin e saktë të detyrimit ligjor nga ana e tyre, duke përfshirë këtu edhe individët e huaj, rezidentë në Republikën e Shqipërisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.