Tatimet: Ja çfarë duhet të bëjnë bizneset e reja në skemën e TVSH-së

Ndryshimet ligjore lidhur me Tatimin mbi Vlerën e Shtuar kanë hyrë në fuqi  prej datës 1 prill 2018. Administrata Tatimore ka bërë regjistrimin e subjekteve në mënyrë automatike në skemën e TVSH-së.

Përmes një njoftimi në faqen zyrtare të saj, Drejtoria e Përgjithshme e Tatimeve udhëzon të gjithë tatimpaguesit që të ndjekin me kujdes këto hapa:

1. Ndryshoni shkallën tatimore në pajisjen tuaj fiskale, duke vendosur masën 20% apo shkallët e reduktuara sipas fushës së veprimtarisë tuaj.
2. Për mallrat gjendje, që dispononi me qëllim për t’u shitur, në vijim do të llogaritet TVSH-ja në shitje. Inventari i mallrave gjendje më datë 31.03.2018, duhet të dorëzohet në drejtorinë rajonale tatimore në të cilën jeni i regjistruar si dhe do të ngarkohet në e-Filing, tek rubrika “Çështjet e mia”, brenda datës 30 Prill 2018.
3. Merrni masat të pajiseni me blloqe të faturave tatimore, që mund t’i tërhiqni pranë drejtorisë rajonale tatimore ku jeni i regjistruar. Ato duhet t’i përdorni në të gjitha rastet kur do të kryeni transaksione me vlerë mbi 40,000 lekë dhe/ose nën këtë vlerë kur e kërkon blerësi.
4. Për çdo blerje malli apo shërbimi, duhet të zotëroni faturën përkatëse tatimore të blerjes. Vetëm kështu mund të zbrisni TVSH-në e blerjeve nga TVSH e shitjeve. Gjithashtu, duhet të justifikoni çdo mall gjendje me faturën përkatëse të blerjes. Faturat me dhe pa TVSH, duhet t’i regjistroni tek Libri i Blerjes, tek kolonat përkatëse.
5. Regjistroni në mënyrë kronologjike në librat e shitjes, çdo faturë tatimore shitjeje të lëshuar nga ana juaj, si dhe qarkullimin ditor të memorizuar të pajisjes fiskale në një shifër të vetme.
6. Librat e blerjes dhe të shitjes dorëzohen çdo tre muaj, brenda datës 10 të muajit pasardhës të tremujorit përkatës. Afati i parë i deklarimit të librave të blerjes dhe shitjes është data 10 Korrik 2018, për periudhat tatimore: Prill- Maj-Qershor 2018.
7. Deklaratat e TVSH-së plotësohen mbi bazën e të dhënave mujore të librave të blerjes dhe shitjes. Ato duhet të dorëzohen çdo tre muaj, brenda datës 14 të muajit pasardhës të tremujorit përkatës. Konkretisht për muajt: Prill-Maj – Qershor 2018, afati i parë i këtij deklarimi është data 14 Korrik 2018. Për muajt: Korrik- Gusht – Shtator 2018, afati i deklarimit është data 14 Tetor 2018. Për muajt Tetor – Nëntor – Dhjetor 2018 afati është data 14 janar 2019.

Më tej, DPT fton të gjithë subjektet që t’i bashkohen trajnimeve në kuadër të përfshirjes së biznesit të vogël në skemën e TVSH-së që po zhvillohen në çdo drejtori rajonale.

Ndërkohë, në rast paqartësie apo për çdo pyetje administratat tatimore ka vënë në dispozicion edhe numrin pa pagesë 0800 00 02 si dhe Këndet e Asistencës të dedikuara për biznesin e vogël.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.