Tatimet, kujtesë biznesit të vogël: Përmbushni detyrimin ligjor! Paraqituni në sportel për deklarimet e punonjësve

Çdo tatimpagues i biznesit të vogël i cili ka si kategori të kontributeve të sigurimeve shoqërore “i vetëpunësuar i vetëm” duhet të paraqitet pranë sportelit të Shërbimit në Drejtorinë Rajonale tatimore ku është i regjistruar për ta ndryshuar atë në “I vetëpunësuar punëmarrës”.

Në një komunikim publik, Drejtoria e Përgjithshme e Tatimeve iu bën apel tatimpaguesve që të përmbushin këtë detyrim ligjor për përditësimin e të dhënave të regjistrimit për punonjësit.

“Ju rikujtojmë detyrimit tuaj ligjor për të përditësuar të dhënat e regjistrimit, bazuar në nenin 43 të ligjit nr.9920 datë 19.05.2008 “Për procedurat tatimore në RSH”, i ndryshuar, si dhe pika 43.2.1 e udhëzimit nr. 24, datë 02.09.2008 “Për procedurat tatimore në RSH”, i ndryshuar. Për të bërë të mundur deklarimin brenda afatit të marrjes në punë apo largimit të çdo punonjësi nëpërmjet formularit ESIG 027, çdo tatimpagues i biznesit të vogël, i cili ka si kategori të kontributeve të sigurimeve shoqërore “I vetëpunësuar i vetëm”, duhet të paraqitet pranë sporteleve të Shërbimit në Drejtorinë Rajonale tatimore ku është i regjistruar, për ta ndryshuar atë, në “I vetëpunësuar me punëmarrës”. Pas aplikimit të tatimpaguesit, Administrata Tatimore do të reflektojë ndryshimin në sistemin e administrimit tatimor” shkruhet në njoftimin e Tatimeve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.