Tatimet shënjestrojnë qiradhënësit – “Duhet të paguani tatimin 15% nga apartamentet e shtëpitë”

Pas aksionit të shtrirë këtë verë në subjektet që japin dhoma me qira për pushuesit në bregdet, tatimet duket sa kanë vendosur nën shënjestër edhe individët e paregjistruar që japin mjedise me qira.

Përmes një njoftimi të publikuar ditën e hënë, Drejtoria e Përgjithshme e Tatimeve u bën apel të gjithë qiradhënësve të paguajnë tatimin mbi të ardhurat e përfituara nga dhënia me qira e shtëpive apo apartamenteve.

Për të identifikuar individët që japin me qira ambiente, administrata tatimore njofton se do të bashkëpunojë edhe me institucione të tjera dhe se do të shfrytëzojë çdo burim informacioni mbi transaksionet.

Masa e tatimit për këto të ardhura llogaritet në 15%, e cila duhet paguar jo më vonë se data 20 e muajit që pason në të cilin është kryer pagesa. Deklarimi për këtë tatim kryhet elektronikisht online, në faqen e tatimeve.

Për vite të tëra sektori i qiradhënies, veçanërisht për banesat, ka funksionuar jashtë syrit të tatimeve, ndërsa tashmë paralajmërohet një aksion edhe në këtë treg. Formalizimi i transaksioneve të qirasë pritet të ketë edhe një efekt në rritjen e çmimeve të qirave të shtëpive e apartamenteve.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.