Tatimet vijojnë aksionet – 42% e bizneseve të kontrolluara u gjobitën
Lufta për parandalimin dhe goditjen e informalitetit vazhdon teksa strukturat e Drejtorisë së Përgjithshme të Tatimeve mbeten të angazhuara.
Kjo drejtori ka raportuar për kontrollet e kryera nga zyra apo në terren për periudhën 5 shkurt- 11 mars 2018.
Drejtoria e Hetimit Tatimor ka kontrolluar rreth 4,143 tatimpagues, nga të cilët 1,295 u penalizuan për shkelje të legjislacionit tatimor, ndërsa rreth 20% e tyre u penalizuan pasi nuk dispononin mallra të shoqëruara nga dokumentacioni tatimor.
Numri total i subjekteve të bllokuara në këtë periudhë arriti në 63, nga të cilat 50 si subjekte të paregjistruara dhe 13 për moslëshim kuponi tatimor.
Ndërkohë, fundjavën e kaluar u kryen edhe 299 kontrolle në terren. Nga këto inspektime u evidentuan rreth 126 shkelje, ose 42% e tatimpaguesve të kontrolluar, të cilët u gjobitën.
Tatimet njoftojnë se aksionet do të vijojnë të shtrira në të gjithë vendin. Kontrollet do të përqëndrohen në verifikimin e subjekteve për
- Verifikimin për dokumentimin me faturë tatimore të mallrave që përdoren, ruhen apo transportohen.
- Regjistrimi i subjekteve tregtare në QKB dhe në organin tatimor.
- Instalimi, përdorimi i pajisjeve fiskale dhe lëshimin e kuponit tatimor.
- Verifikimin dhe deklarimin e punonjësve në organet tatimore.
- Kontroll për dokumentimin e pronësisë së ambjentit të ushtrimit të aktivitetit dhe të mjetit të transportit.
- Të tjera verifikime që mund të dalin të nevojshme gjatë ushtrimit të kontrolleve
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.