Të ardhurat doganore – 11-mujori, 9.2 miliardë lekë më shumë se viti 2016

Administrata  doganore ka arritur të mbledhë të ardhura më shumë se një vit  më parë në arkën e shtetit. Drejtore e Përgjithshme e Doganave, Belinda Ikonomi, u shpreh gjatë një interviste për TV SCAN,  se gjatë periudhës 11 mujore në buxhet janë arkëtuar 144 miliardë lekë, ndërkohë që  në të njëjtën periudhë të një viti më parë ishin 134 miliardë lekë. Sipas saj, të ardhurat pozitive janë realizuar nga të gjithë zërat.

“Përgjatë kësaj periudhe 11mujore kemi realizuar rreth 144 miliardë lekë, nga 134 që kanë qenë në vitin 2016. Pra, po ta konsideroj kemi një rritje të konsiderueshme të të ardhurave 9.2 miliardë lekë më shumë se 2016, pra rreth 6.5% më shumë të ardhura të mbledhura nga Administrata Doganore. Unë them që pak a shumë që të gjithë të ardhurat nga taksat specifike kemi tregues pozitivë. Kemi tregues pozitivë gjithashtu edhe te të ardhurat e akcizës. Pra, le të themi te pjesa e përmbushjes së misionit fiskal, ky ka qenë një vit i suksesshëm.”

Gjatë gjithë viteve të  mëparshëm  kjo administratë  nuk ka performuar pozitivisht.  Por,  duket  se fillimi I këtij viti buxhetor  ka ndryshuar trendin  e  ecurisë në mbledhjen e të ardhurave. Por drejtore e Doganave e analizon rritjen e të ardhurave më  reformat e ndërmarra,  si dhe efektin pozitiv që  ka patur dhe fakti i ndryshimit të qasjes  së kësaj administrate  ndaj biznesit.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.