Të ardhurat nga akciza – 11-mujori, arkëtohen 3.4 miliardë lekë më shumë se 2016
Të ardhurat në buxhetin e shtetit gjatë 11-mujorit të vitit të shkuar kanë qenë më të larta se një vit më parë. Një ndër zërat kryesorë të të ardhurave në buxhetin e shtetit është ai i akcizës.
Kështu referuar statistikave zyrtare të Ministrisë së Financave, rezulton të ardhurat nga “Akciza” janë realizuar në vlerën 41.4 miliard lekë, 8.9% ose 3.4 miliard lekë më shumë se 11-mujori i vitit 2016, dhe 0.7% ose rreth 285 milion lekë më pak se plani.
Sipas analizës së specialistëve të financave, ndikim kryesor ka pasur importi dhe prodhimi vendas i karburanteve që rezultoi rreth 511 mijë ton, me një rritje prej +8% krahasuar me 11-mujorin e vitit 2016. Gjithashtu rritje kanë shënuar, importi i “Gazit të Lëngët” me 16%, importi dhe prodhimi i “Birrës” me 17%, importi i “Pijeve Energjike” me 17%, importi dhe prodhimi i “Verës” me 12%, dhe importi i “Cigareve” me 7%.
Importi i “Kafes” ka shënuar një rritje në të ardhurat nga akciza me rreth 5% krahasuar me Janar-Nëntor 2016 ndërsa deklarimi i prodhimit vendas të duhanit është rritur nga 0.9 ton në 10.8 ton të deklaruara për këtë periudhë të 2017.
Ndërkohë, që në fillim të vitit qeveria përfshiu për herë të parë në sistemin e akcizës edhe gazin e lëngshëm, si një mundësi për të rregulluar tregun, por pse jo edhe për të rritur të ardhurat në buxhet. Por duke parë rritjen e importit të mallrave mund të ketë ndikuar rritja e konsumit, dhe e dyta aksioni ndaj informalitetit mund të ketë ndikuar në uljen e evazionit dhe kontrabandës në këtë sektor.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.