Të ardhurat nga arti – Mbi 15 milionë lekë, 7 mln më pak se 2016. Shifrat optimiste për 2018-ën 

Rreth 7 milion lekë më pak janë të ardhurat  e siguruara për 2017-ën  nga shfaqjet teatrale të institucioneve të ndryshme të artit në vendin tonë .

Nga të dhënat e siguruara për televizionin SCAN nga ministria e Kulturës  rezulton se  vitin e kaluar  kjo ministri ka siguruar  fondin prej 15 milion 126 mijë lekësh nga biletat e shitura,  ku  të ardhurat më të mëdha  kanë  sjellë  Teatri Kombëtar i Operas dhe Baletit  me 4.7 milion lekë dhe  Teatri Kombëtar me 4.2 milion lekë .

Ndërsa  referuar  vitit që lamë pas, teatri eksperimental  përmes  shfaqjeve të ndryshme  i  ka shtuar buxhetit 2.8 milion lekë,  ndërsa Qendra Kombëtare e Kulturës Për Fëmijë 1.7 milion lekë .

Dy institucionet që rezultojnë me të ardhura më të ulëta janë  Galeria kombëtare e Arteve  me 742.6 mijë lekë dhe  Cirku me 749.7 mijë  lekë.

Viti me më shumë të ardhura  nga shfaqjet teatrale që prej 2013-ës rezulton 2016-ta  me 22 milion lekë  ndërsa  të ardhurat më të pakta janë siguruar në 2013-ën  vetëm 9.3 milion lekë .

Ndërsa ajo që bie në sy ndryshe nga viti që lamë pas është së në muajt e parë të 2018-ës shifrat janë optimiste.

Të ardhurat  nga biletat e  shitura  deri më tani,  kapin shifrën prej 5.9 milion lekësh dhe vendin e parë  për të ardhurat më të larta e mban sërish Teatri Kombëtar i Operas dhe Baletit me 2.8 milion lekë .

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.