Të ardhurat nga fasonët/ 123 milionë euro për tremujorin e parë
Sektori i fasoneve i ka sjellë ekonomisë shqiptare 123 milionë euro në tremujorin e parë të këtij viti. Sipas të dhënave nga Banka e Shqipërisë, të ardhurat nga shërbimet e përpunimit të mallrave të porositësve jashtë vendit u rritën me 15% krahasuar me të njëjtën periudhë të një viti më parë. Fasonet ngelen kolona kryesore ku mbështeten eksportet shqiptare, me mbi 40% të volumeve totale vjetore.
Sektori i fasoneve është i përqendruar kryesisht tek prodhimi i veshjeve dhe këpucëve me porosi nga jashtë, por, në vitet e fundit, ka një zgjerim të spektrit të produkteve që prodhohen në Shqipëri. Ky biznes i rezistoi mirë krizës dhe në dekadën e fundit përgënjeshtroi parashikimet për një rënie graduale, si pasojë e konkurrencës nga tregjet ku krahu i punës është edhe më i lirë.
Falë afërsisë gjeografike me Europën Perëndimore, përvojës së fituar në 25 vjet, por edhe falë pagave shumë të ulëta, fasoneria shqiptare po arrin jo vetëm të mbijetojë, por edhe të rritet vit pas viti. Sipas Institutit të Statistikave, në Shqipëri janë afërsisht 1300 ndërmarrje me aktivitet në prodhimin e tekstileve, veshjeve dhe këpucëve, të cilat, në pjesën dërrmuese, punojnë me porosi nga jashtë vendit.
Një degë e rëndësishme e industrisë fasone është edhe përpunimi i produkteve të detit dhe sidomos i açugeve. Fasoneria ka hyrë edhe në degë më specifike dhe që kërkojnë një shkallë relativisht të lartë specializimi, si për shembull elektromotorët.
Në total, ekonomia shqiptare përfitoi në tremujorin e parë të vitit 289 milionë euro nga shërbimet e eksportuara. Pjesën kryesore e zënë pikërisht fasonet dhe turizmi, por këtyre iu shtohen edhe shërbimet që nuk lidhen me përpunim të mallrave, si shërbimet call center apo ato të teknologjisë së informacionit për kompani të huaja.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.