Të ardhurat nga fasonet – 260 milionë euro në nëntë muaj
Të ardhurat e biznesit me fason në vend thelluan rritjen në tremujorin e tretë të vitit. Sipas të dhënave nga Banka e Shqipërisë, ekonomia shqiptare në tremujorin e tretë përfitoi gjithsej 112 milionë euro për shërbime të përpunimit të mallrave të porositura nga jashtë vendit.
Kjo shifër përfaqëson një rritje të lehtë me afro 20 milionë euro ndaj të njëjtës periudhë të një viti më parë. Për gjithë 9-mujorin, të ardhurat totale nga puna me fason arritën në 260 milionë euro, në rritje me 8.3%.
Fasonet ngelen kolona kryesore ku mbështeten eksportet shqiptare, me rreth 44% të volumeve totale vjetore. Përkundrejt pesimizmit të një dekade më parë, biznesi me fason në vitet e fundit ka përjetuar një shkëlqim të ri dhe i ka rezistuar mirë krizës.
Ky sektor ngelet i përqendruar kryesisht tek prodhimi i veshjeve dhe këpucëve me porosi nga jashtë, por, në vitet e fundit, ka një zgjerim të spektrit të produkteve që prodhohen në Shqipëri, për shkak të kostove të ulëta të krahut të punës.
Fasoneria ka hyrë edhe në segmente të tjera të industrisë përpunuese, si për shembull në prodhimin e pajisjeve dhe instrumenteve industriale. Në total, ekonomia shqiptare përfitoi në gjatë 9-mujorit 2017, 864 milionë euro nga shërbimet e eksportuara.
Pjesën kryesore e zënë pikërisht fasonet dhe turizmi, por këtyre iu shtohen edhe shërbimet call center apo ato të teknologjisë së informacionit për kompani të huaja.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.