Të ardhurat nga parkimi publik – Në 3 muaj u shitën 145.370 bileta, mbi 17 mijë te sheshi ‘Skënderbej’
Për 3-mujorin e dytë të vitit Agjencia “Tirana Parking” ka shitur 145 370 bileta në 10 sheshet ku janë vendosur vendparkimet, duke krijuar të ardhura të kënaqshme për Bashkinë e Tiranës.
Sipas të dhënave të raportuara nga kjo kompani rezulton se numri më i lartë i biletave është shitur gjatë muajit qershor, që përkon me hapjen e dy vendparkimeve të reja: atij të sheshit ‘Skënderbej’ dhe Bulevardit të Ri, duke rritur edhe më shumë të ardhurat.
Vetëm gjatë këtij muaji, në sheshin Skënderbej janë shitur 17.128 bileta, çka do të thotë se minimalisht janë arkëtuar rreth 3.4 milion lekë, nëse kemi parasysh se 0-3 orë qëndrimi në këtë shesh kushton 200 lekë.
Ndërkohë që, sa i takon të ardhurave për 3-mujorin e dytë rezulton se minimalisht janë arkëtuar edhe 14.3 milion lekë nga 8 sheshet e tjerë, ku një orë qëndrimin kushton 100 lekë.
Në krahasim me 3-mujorin e parë numri i biletave të shitura rezulton në rritje, duke qenë se për periudhën janar-mars, kompania Tirana Parking raportoi 95.263 bileta të shitura, apo rreth 50 mijë bileta më pak se 3-mujori i dytë.
Tirana ndahet në 4 zona Administrimi për Parkim dhe 3 zona tarifore ku janë të përfshira rrugët, ku ka hapësira publike për parkim. Kapaciteti i vendparkimeve Publike në total është 24000 vende.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.