Të ardhurat nga privatizimet – 10-mujori, arkëtohen 402 milionë lekë në buxhet
Të ardhurat nga privatizimet e objekteve shtetërore ndër vite kanë qenë një zë i rëndësishëm në buxhetin e shtetit. Por me privatizimin e objekteve strategjike, këto të ardhura janë ulur. Tashmë “pronë e shtetit”, pranë Ministrisë së Financave dhe Ekonomisë kanë mbetur mjaft objekte “të vogla”.
Qeveria shqiptare gjatë këtij viti ka arritur të shesë objekte shtetërore më shumë se kishte parashikuar në fillim të vitit. Kështu referuar statistikave zyrtare të dikasterit të Financave, rezulton se për periudhën 10-mujore janë arkëtuar në buxhet nga privatizimet 402 milion lekë, ose 52 milion lekë më shumë se parashikimi i fillimvitit.
Nga institucioni i Financave dhe Ekonomisë, këtë vit u përgatit dhe paketa e katërt e privatizimit me 50 objekte, të ish-ndërmarrjeve shtetërore tashmë në faliment. Objektet shtrihen në të gjithë vendin, por një pjesë e madhe e tyre u përkasin kryesisht institucioneve si Ministrisë së Transporteve, Qarkut të Elbasanit, Ministrisë së Mjedisit dhe Drejtorisë së Ruajtjes së Rezervave të Shtetit. Pranë kësaj ministrie më parë janë paraqitur edhe tre listat e mëparshme secila me 60 dhe 40 objekte.
Ndërkohë kërkesa për privatizimin e një aseti shtetëror mund të drejtohet në Ministrinë e Financave dhe Ekonomisë apo në institucionin përkatës që ka në administrim pronësi objektin që kërkon të privatizohet, e cila mund të bëhet nga pronari i truallit ose çdo person tjetër/institucion i interesuar për blerjen e asetit.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.