Të ardhurat nga turizmi – 1.3 miliardë euro për nëntë muaj
Të ardhurat e ekonomisë shqiptare nga turizmi hyrës regjistruan një shifër rekord gjatë sezonit të këtij viti. Sipas të dhënave nga Banka e Shqipërisë, të ardhurat nga udhëtimet në bilancin e pagesave prekën vlerën e 588 milionë eurove për tremujorin e tretë të vitit, në rritje me afro 13% krahasuar me të njëjtën periudhë të një viti më parë. Deri tani gjatë këtij viti, të ardhurat nga turizmi po zgjerohen ndjeshëm.
Për 9-mujorin, ato prekën vlerën e 1.3 miliardë eurove, me një rritje sërish në kufijtë e 13%. Të ardhurat nga turizmi po shfaqin një tendencë në rritje gjatë viteve të fundit, ndërsa për vitin e kaluar arritën shifrën rekord të 1.5 miliardë eurove. Megjithatë, duke parë tendencën e 9-mujorit, kjo shifër është e destinuar të tejkalohet për vitin 2017.
Sipas Institutit të Statistikave, për periudhën janar- tetor në Shqipëri kanë hyrë rreth 4.6 milionë shtetas të huaj, 7% më shumë krahasuar me të njëjtën periudhë të vitit të kaluar. Por, nga ana tjetër, në rritje paraqiten edhe shpenzimet e shqiptarëve për udhëtime jashtë vendit, që janë treguesi kryesor i tërthortë për sa i takon turizmit dalës.
Sipas Bankës së Shqipërisë, në tremujorin e tretë të vitit shqiptarët shpenzuan 407 milionë euro, në rritje me afro 10% kundrejt të njëjtës periudhë të një viti më parë. Për gjithë 9-mujorin, shpenzimet e shqiptarëve jashtë vendit arritën në 974 milionë euro, në rritje vjetore me 12%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.